Մարդու իրավունքների եվրոպական դատարանը (ՄԻԵԴ) քննում է Հայաստանի՝ հինգշաբթի գիշերը Ադրբեջանի կողմից գերեվարված հայ զինծառայողների իրավունքների պաշտպանությունն ապահովելու հայցը: Այս մասին ուրբաթ օրը Ստրասբուրգի դատարանում ասել են ՏԱՍՍ-ի թղթակցին:
«Դատարանը ստացել է նման միջնորդություն, այն ներկայումս քննվում է: Մենք դեռևս չենք կարող ավելի մանրամասն տեղեկատվություն տրամադրել»,- ասել է դատարանի ներկայացուցիչը:
Ինչպես արդեն հայտնել ենք՝ մայիսի 27-ի վաղ առավոտյան, Հայաստանի Հանրապետության Գեղարքունիքի մարզի սահմանային հատվածում՝ ՀՀ ԶՈՒ N զորամասի պահպանության տարածքում ինժեներական աշխատանքներ կատարելիս, ադրբեջանական զինված ուժերի զինծառայողների կողմից շրջափակվել և գերեվարվել է ՀՀ ԶՈՒ վեց զինծառայող։
ՀՀ տարածքում` առանց սահմանը հատելու ինժեներական աշխատանքներ կատարած ու գերեվարված անձինք են պայմանագրային զինծառայողներ Ա. Ն. Աբգարյանը, Ի. Ա. Սարգսյանը, Վ. Վ. Սարգսյանը, Բ. Ս. Օհանյանը, Ա. Գ. Բուդոյանը, Վ. Օ. Ռաֆայելյանը։
Ադրբեջանի Հանրապետության պաշտպանության նախարարության տարածած հայտարարությունը, ըստ որի՝ ադրբեջանական ԶՈՒ կողմից գերեվարված հայ զինծառայողները գտնվել են Ադրբեջանի տարածքում, չի համապատասխանում իրականությանը: