Մայիսի 30-ին ՀՀ Վերաքննիչ դատարանը պետք է քննի Քոչարյանի վերաբերյալ ներկայացված դատախազության բողոքը։ ՀՀ գլխավոր դատախազությունը ապրիլի 22-ին բողոքարկել էր Մարտի 1-ի գործով Ռոբերտ Քոչարյանի, Սեյրան Օհանյանի, Յուրի Խաչատուրովի և Արմեն Գևորգյանի նկատմամբ ՀՀ ՔՕ 300.1 հոդվածով քրեական հետապնդումը դադարացնելու և քրեական գործի վարույթը կարճելու մասին Առաջին ատյանի դատարանի որոշումը:
Հիշեցնենք, որ ապրիլի 6-ին Երևան քաղաքի ընդհանուր իրավասության դատարանը դատավոր Աննա Դանիբեկյանի նախագահությամբ որոշեց Ռոբերտ Քոչարյանի, նախկին բարձրաստիճան պաշտոնյաներ Սեյրան Օհանյանի, Արմեն Գևորգյանի և Յուրի Խաչատուրովի նկատմամբ քրեական հետապնդումը ՀՀ ՔՕ 300.1 հոդվածով դադարեցնել՝ հանցագործության դեպքի բացակայության հիմքով:
Դրանից հետո Դատախազությունը նախ դիմեց Սահմանադրական դատարան, ապա նաև՝ վերաքննիչ դատարան։ Սահմանադրական դատարանը, հիշեցնենք, մայիսի 14-ի աշխատակարգային որոշմամբ մերժեց ՀՀ գլխավոր դատախազի դիմումի հիման վրա սկսված գործի քննությունը՝ հիմնավորմամբ, որ գլխավոր դատախազն իրավասու չէ դիմել ՀՀ Սահմանադրական դատարան՝ դատական քննության փուլում քննվող քրեական գործով կիրառման ենթակա նորմի սահմանադրությանը համապատասխանության հարցով։
Մարտի 1-ի գործով տուժողների իրավահաջորդի ներկայացուցիչ, փաստաբան Սեդա Սաֆարյանը առանձնապես սպասելիքներ, սկնկալիքներ չունի նաև Վերաքննիչ դատարանից։ Նա «Առաջին լրատվական»-ի հետ զրույցում ասաց, որ Վերաքննիչ դատարանը իր որոշումը կայացնելուց առաջ արդեն արտակուլիսային բանակցությունների մեջ եղել են․«Մենք նաև գիտենք, որ Վերաքննիչ դատարանում ամբաստանյալ Ռոբերտ Քոչարյանը ունի համակիրների մեծ շրջանակ և այդ ազդեցությունը բացառված չէ, որ դերակատարություն կունենա։ Վերաքննիչ դատարանը շատ վիճարկելի դաշտում է գտնվում, նրա կայացրած ցանկացած որոշում կրկին կարող է դառնալ վիճարկելի։ Եվ սրանով պայմանավորված՝ վստահ եմ, որ ինչպես առաջին ատյանում, այնպես էլ Վերաքննիչ դատարանում առավելապես կարևորվելու են ամբաստանյալների շահերը և պակաս կարևորվելու են տուժողների շահերը։ Այդ հավասարության սկզբունքի խախտումը հերթական անգամ տեսանելի է լինելու առաջին ատյանից մինչև Վերաքննիչ։ Հետևաբար հակված եմ ասելու, որ սպառում եմ ներպետական պայքարի բոլոր միջոցները»,-ասաց տիկին Սաֆարյանը՝ հավելելով, որ այս գործով ևս իր միակ հույսը մնում է Եվրոպական դատարանը։
Փաստաբանը հերթական անգամ ընդգծեց, որ դատախազությունը սխալ ճանապարհով գնաց Սահմանադրական դատարան դիմելիս։ «Ես շարունակում եմ պնդել, որ քրեական օրենսգրքի 309 հոդվածը թույլ էր տալիս մինչև դատավորի խորհրդակցական սենյակ մտնելը մեղադրանքը հետ վերցնել և վերաորակել այն, ինչը չարվեց։ Ես հակված եմ նրան, որ այդտեղ հստակ միտում կար»,-եզրափակեց Սաֆարյանը։
