Այսօր Արմենիա Մարիոթ հյուրանոցի “Տիգրան Մեծ” դահլիճում տեղի ունեցավ «Հյուսիս-հարավ» ճանապարհային միջանցքի ներդրումային ծրագրի` Ծրագիր 1-ի և Ծրագիր 2-ի շնորհանդեսը:
«Հյուսիս-հարավ» ճանապարհային տրանսպորտային միջանցքը` ընդհանուր երկարությունը 556 կմ, կապահովի ՀՀ, Վրաստանի տարածքներով ելք դեպի Սև ծով և այնուհետև դեպի Եվրոպական երկրներ: Հատելով ՀՀ տարածքը հարավից հյուսիս` (Մեղրի-Կապան-Գորիս-Երևան-Աշտարակ-Գյումրի-Բավրա) միջանցքը կմիանա վրացական ճանապարհին հարավային կողմից:
Ծրագրի իրականացման արդյունքում կբարելավվի Եվրոպա-Կովկաս-Ասիա ճանապարհային հաղորդակցությունը` Արևմտյան Ասիայի և Արևելյան Եվրոպայի հատման վայրում: Միջազգային պահանջներին բավարարող միջանցքը կհանդիսանա առավել հարմար և կարճ` Իրանի կողմից Վրաստանով դեպի ԵՄ երկրներ տարանցիկ ճանապարհի համար:
