Ռուս-հայկական հարաբերությունները փորձված են ժամանակով։ Այս մասին ասել է ՌԴ ԱԳ նախարար Սերգեյ Լավրովը Аргументы и факты լրատվամիջոցին տված հարցազրույցում: Լավրովը համոզմունք է հայտնել, որ այդ հարաբերությունները կշարունակեն զարգանալ փոխադարձ վստահության, ռազմավարական գործընկերության և դաշնակցային փոխհարաբերությունների ոգով։
«Մեր երկիրը միշտ պատրաստ է նեցուկ լինել եղբայրական հայ ժողովրդին։ Դրա վկայությունն են Ռուսաստանի, անձամբ նախագահ Վ․ Վ․ Պուտինի միջնորդական ջանքերը, որոնց շնորհիվ հնարավոր եղավ վերջ դնել 2020-ի աշնանը Լեռնային Ղարաբաղում ընթացող ռազմական հակամարտությանը, սկիզբ դնել տարածաշրջանում իրավիճակի կարգավորման գործընթացին»,- ասել է ՌԴ ԱԳ նախարարը։
Լավրովը նաև նշել է, որ Հայաստանի, Ադրբեջանի և Ռուսաստանի ղեկավարների միջև ձեռք բերված եռակողմ համաձայնագիրը հաջողությամբ իրականացվում է, մասնավորապես՝ հակամարտության հումանիտար և սոցիալ-տնտեսական հետևանքների վերացման, Հարավային Կովկասում տրանսպորտային և տնտեսական կապերի ապաշրջափակման առումով։ Լավրովի խոսքերով՝ ռուսական աջակցությունը բարձր գնահատականի է արժանանում հայաստանցի գործընկերների կողմից։
«Կարևոր է նաև հասկանալ, որ Ռուսաստանի և Հայաստանի հարաբերությունները չեն սահմանափակվում Լեռնային Ղարաբաղի խնդրով: Մենք աննախադեպ ակտիվ և վստահելի քաղաքական երկխոսություն ենք հաստատել ամենաբարձր և այլ մակարդակներում: Միայն այս տարի մեր ղեկավարները երկու անգամ հանդիպել են, բազմաթիվ հեռախոսազրույցներ են ունեցել: Մայիսի սկզբին ես այցելեցի Երևան: Իրականացվում են միջխորհրդարանական փոխանակումներ»,- ասել է ՌԴ արտգործնախարարը:
Ռուսաստանի արտաքին գերատեսչության ղեկավարը նաև նշել է, որ Ռուսաստանը կորոնավիրուսի դեմ Sputnik V պատվաստանյութի տասնյակ հազարավոր դեղաչափեր է մատակարարել Հայաստանին։ Կողմերը նաև զարգացնում են կապերն առևտրի և տնտեսության ոլորտում։
