Իսրայելի տասնյակ քաղաքներում ձերբակալվել է փողոցային անկարգությունների ավելի քան 370 մասնակից։ 36 իրավապահ վիրավորվել է։ РИА Новости գործակալության փոխանցմամբ՝ այս մասին հաղորդել է Իսրայելի ոստիկանության պաշտոնական ներկայացուցիչ Միկի Ռոզենֆելդը։ Նրա խոսքով՝ գերատեսչության աշխատակիցները շարունակում են գործել Իսրայելի տարբեր շրջաններում։
Չորեքշաբթի երեկոյան իսրայելական տասնյակ քաղաքներում ցույցերը վերածվել են ոստիկանության հետ բախումների։ Երկրի հյուսիսային Ակկո քաղաքում տեղի արաբ բնակիչները քարեր են նետել ոստիկանության բաժանմունքի վրա։
Բաթ-Յամ քաղաքում հրեա տասնյակ երիտասարդներ երթ են կազմակերպել, հարձակվել են արաբական ձեռնարկությունների վրա, կոտրել են ապակիներ, տարբեր առարկաներ են նետել և ռասիստական կարգախոսեր վանկարկել։
Չորեքշաբթի ավելի վաղ անկարգություններ էին տեղի ունեցել Լոդ քաղաքում, որտեղ արաբական բավական մեծ բնակչություն կա։ Ցուցարարները հարձակվել էին տեղի շուկայի և հրեական հոգևոր դպրոցի վրա, այրել տասնյակ ավտոմեքենաներ։ Երեկոյան Լոդում պարետային ժամ է մտցվել, ավելի վաղ արտակարգ դրություն էր հայտարարվել։
Միևնույն ժամանակ մեծ ուժգնությամբ շարունակվում է իսրայելապաղեստինյան հակամարտությունը։ Գազայի հատվածը վերահսկող ՀԱՄԱՍ իսլամիստական շարժումը և Իսրայելի բանակն ակտիվորեն հարվածներ են հասցնում միմյանց։ Պաղեստինցիները տասնյակ հրթիռներ են արձակել իսրայելական քաղաքների վրա։ Իսրայելն էլ իր հերթին է հարվածներ հասցրել, ինչի հետևանքով Գազայում ևս մեկ բազմահարկ շենք է փլուզվել։
Երկուշաբթի օրվանից Գազայի հատվածում առնվազն 67 մարդ է մահացել, այդ թվում՝ 17 երեխա։ Շուրջ 390 մարդ վիրավորվել է։ Իսկ իսրայելական կողմից մահացել է 7 մարդ, այդ թվում՝ 1 երեխա։ Շուրջ 100 մարդ վիրավոր է։
