Իսրայելի իշխանությունները էթնիկ զտումներ են իրականացնում Երուսաղեմում։ Նման հայտարարությամբ է հանդես եկել Պաղեստինի նախագահ Մահմուդ Աբբասը։
«Իսրայելցի զավթիչները ռազմական հանցագործություններ են կատարում և էթնիկ զտումներ իրականացնում ՝ ուղղված Երուսաղեմում պաղեստինցիների ներկայության դեմ»,- նրա խոսքը մեջբերում է Al Jazeera հեռուստաալիքը:
«Երուսաղեմը Պաղեստինի պետության մայրաքաղաքն է, որի այլընտրանքը մենք չենք ընդունում», – ընդգծել է Աբասը:
Նա նաև կոչ է արել բոլոր պաղեստինցիներին միավորվել և հակահարված տալ Իսրայելին։
«Ես կոչ եմ անում միասնական Պաղեստինին դիմակայել իսրայելցի զավթիչների բարբարոսական ագրեսիային ։ <…> Երուսաղեմը կմնա պաղեստինյան, եկեք ետևում թողնենք մեր [ներքին] տարաձայնությունները», – ասել է Աբբասը:
Երկուշաբթի օրվանից Գազայի հատվածում իսրայելական բանակը և պաղեստինյան խմբավորումները չեն դադարեցնում հրթիռակոծությունները, որոնք հաջորդել են մայիսի սկզբին Արևելյան Երուսաղեմում Ալ Աքսա մզկիթի մոտ տեղի ունեցած անկարգություններին, որտեղ ավելի քան 700 պաղեստինցիներ են տուժել:
Գազան վերահսկող ՀԱՄԱՍ շարժման մարտական թևը ՝ «Իզզեդդին ալ Քասամի», հայտարարել է մայիսի 11-ին և մայիսի 12-ին հարյուրավոր հրթիռների արձակման մասին Թել Ավիվի, Բեեր Շևայի, Աշկելոնի, Աշդոդի և հրեական պետության այլ քաղաքների ուղղությամբ:
Գազայի հատվածի առողջապահության նախարարության վերջին տվյալների համաձայն ՝ իսրայելական հարվածների հետևանքով զոհվել է 56 պաղեստինցի, այդ թվում ՝ 16 անչափահաս և երեք կին: Ավելի քան 350 մարդ վիրավորվել է։