Ամերիկացի դերասան Թոմ Կրուզը վերադարձրել է «Ոսկե գլոբուս»-ի իր մրցանակները: Նրան բարկացրել է ժյուրիի անդամների թվում ռասայական բազմազանության բացակայությունը: Այս մասին հայտնում է CNN-ը՝ հղում անելով իր աղբյուրներին, որոնք մոտ են Թոմ Քրուզին:
Հեռուստաընկերությունը տեղեկացրել է նաև, որ դերասանն իր ամբողջ կարիերայի ընթացքում երեք անգամ դարձել է «Ոսկե գլոբուս»-ի դափնեկիր:
Մի քանի օր առաջ «NBC» հեռուստաընկերությունը, որն ավանդաբար հեռարձակել է «Ոսկե գլոբուս»-ի մրցանակաբաշխությունը, հաղորդել է, որ այլևս չի անելու դա, քանի որ ժյուրին չի արտացոլում ամերիկյան հասարակության բազմազանությունը: Միաժամանակ հայտնել է, որ պատրաստ է 2023-ին հեռարձակել մրցանակաբաշխությունը, եթե ժյուրիի կազմում փոփոխություններ արվեն:
