Հայաստանի Եվրոպական կուսակցությունը հայտարարություն է տարածել, որտեղ նշում են, որ Տիգրան Խզմալյանն ու Արկադի Վարդանյանը դուրս են գալիս Ազգային ժողովրդավարական բևեռից ու շարունակելու են պայքարը Հայաստանի Եվրոպական կուսակցության ձևաչափով։
Նաև նշվում է, որ բևեռում կային տարակարծություններ՝ ընտրություններին մասնակցել-չմասնակցելու վերաբերյալ։ Բևեռի անդամներից Ժիրայր Սեֆիլյանի, Արա Պապյանի ու Վարուժան Ավետիսյանի դեպքում նաև՝ ընտրություններին մասնակցելու խոչընդոտներ.«Ժիրայր Սեֆիլյանի համար խոչընդոտ է հանդիսանում նրան ընդամենը 3 տարի առաջ տրված քաղաքացիությունը, Արա Պապյանի համար՝ նրա երկքաղաքացիությունը, Վարուժան Ավետիսյանի համար՝ նրա հանդեպ 9 ու կես տարվա ազատազրկման սպառնալիքը։ Ստեղծված իրավիճակում, երբ շատ բարձր է ռեժիմի կողմից Բևեռը որակազրկելու և ընտրարշավից հանելու վտանգը, երբ Բևեռի կազմում տարաձայնություններ կան մարտավարության հարցով, մենք՝ Եվրոպական կուսակցության ներկայացուցիչներս, ովքեր վերջին շրջանում ձևավորում էին Ազգային-ժողովրդավարական Բևեռի ռազմավարությունն ու օրակարգը, որոշում ենք ընդունել «մատյան գնդի» դերը ստանձնելու և անհրաժեշտության դեպքում փոխարինելու մեր գործընկերներին քաղաքական Ավարայրի այս ճակատամարտում»,-նշվում է տարածված հայտարարության մեջ։
«Առաջին լրատվական»-ը Տիգրան Խզմալյանից հետաքրքրվեց՝ արդյոք տարաձայնությունները վերաբերել են միայն ընտրություններին մասնակցել-չմասնակցելու հարցի շուրջ. «Ոչ միայն, բայց դա կարևոր հարց է։ Դա այն հարցերից մեկն է, որի պատասխանը մենք դեռ չենք ստացել և մենք ուզում ենք վստահ լինել, որ ժողովրդավարական ուժերը անպայման ներկայացված կլինեն։Ինչպես մենք գրեցինք՝ ունենք մտահոգություններ, որ մեր գործընկերները տեխնիկական պատճառներով չենք կարողանա մասնակցել։ Մենք ուզում ենք բացառել իրավիճակ, երբ ընտրություններին մասնակցելու են միայն ռուսական գործակալները»,-ասաց նա՝ շեշտելով, որ իրենք մասնակցելու են միայն ՝ Հայաստանի Եվրոպական կուսակցության դրոշի ներքո։
Տիգրան Խզմալյանը կարծիք հայտնեց, որ Հայաստանում կան բավական քանակությամբ մարդիկ, ովքեր ուզում են, որ Հայաստանը լինի եվրոպական,ազատ, բարգավաճ, օրինական, ժողովրդավարական երկիր.«Որ իրենց երեխաները ստանան եվրոպական կրթություն, ծնողները՝ եվրոպական մակարդակի առողջապահական բուժօգնություն»։
Կա արդյոք Հայաստանում արևմտամետ այնպիսի ընտրազանգված, որը կկոնսոլիդանա իրենց շուրջ, դիտարկմանն ի պատասխան, մեր զրուցակիցը պատասխանեց.«Ես չեմ համարում, որ այդ զանգվածն արևմտամետ է։ Բավական է լինել պետականամետ։ Հայաստանի պետականությունն այժմ կարող է պահպանված լինել միայն Եվրոպական միության ու ԱՄՆ-ի ջանքերի շնորհիվ։ Ռուսաստանն ու Թուրքիան անում են ամեն ինչ՝ մեր աչքի առաջ ոչնչացնելու մեր պետականությունը և մեր ազգային ինքնությունը։ Արդյոք սեփական երկիրը, սեփական երեխաներին պաշտպանելու ցանկությունը արևմտամետ կամ որևէ այլ «մետ» բան է։Դա նորմալ հայ մարդու ցանկություն է և ես վստահ եմ, որ մենք կկարողանանք դա իրականացնել»։
Ազգային Ժողովրդավարական Բևեռից առայժմ չեն մեկնաբանում Տիգրան Խզմալյանի ու Արկադի Վարդանյանի որոշումը՝ նշելով, որ առաջիկայում այդ մասին հայտարարություն կտարածեն։
