Ասադն Էրդողանին պատասխանում է տանկերո՞վ

Թուրքական Cumhuriyet թերթի փոխանցմամբ՝ Դամասկոսում ավարտվել է Թուրքիայի արտգործնախարար Ահմեդ Դավութօղլուի և Սիրիայի նախագահ Բաշար Ալ-Ասադի հանդիպումը։ Երեք ժամ տևած այդ հանդիպման մի մասին մասնակցել է նաև Սիրիայի արտգործնախարար Վելիդ Մուալիմը, ապա կողմերն անցել են դռնփակ հանդիպման։

Ակնկալվում է, որ Ասադին Էրդողանի ուղերձը հանձնած Դավութօղլուն պետք է նշած լինի բռնություններին վերջ դնելու և անհապաղ բարեփոխումներ անցկացնելու մասին։

Թուրքական լրատվամիջոցը նշում է, որ Դավութօղլուի Դամասկոս մեկնելու ժամանակ սիրիական բանակը տանկերի օգնությամբ ռազմական գործողություններ է սկսել Թուրքիային սահմանին մերձակա Իդլիբ նահանգում։

Հիշեցնենք, որ սիրիական կողմը՝ հանձինս Ասադի խորհրդականի, թուրքական կողմին նախազգուշացրել էր կոշտ ուղերձ ստանալու դեպքում վճռական պատասխան տալ։