Մարդու իրավունքների պաշտպանությունը մեր պետականության առաջնահերթություններից մեկն է։ Այն հիմնական պետական մարմինը, որը ՀՀ-ում կատարում է այս գործառույթը, բավականին բարձր մակարդակով է դա անում։ Այս մասին ԱԺ-ում ասաց ԼՀԿ պատգամավոր Տարոն Սիմոնյանը՝ դիմելով ՄԻՊ Արման Թաթոյանին․
«Ուրախությամբ պետք է փաստեմ, որ ձեր աշխատանքը արձագանք է գտնում նաև միջազգային հարթակներում։ Վերջին իրադարձությունների հետ կապված արցախայության իրավունքների պաշտպանությանն ուղղված ձեր բոլոր ջանքերը լուրջ արձագանք են գտել միջազգային հարթակներում։ Հպարտանալու տեղիք է տալիս նաև, որ մարդու իրավունքների պաշտպանությամբ զբաղվող բոլոր միջազգային կառույցները միանշանակ ընդունում են ձեր կատարած աշխատանքը և ընդգծում են՝ ՀՀ ՄԻՊ աշխատանքն օրինակելի է։ Եթե որոշ դեպքերում մենք ենք այլ երկրներից փորձ վերցնում, այս դեպքում մեր պետական ինստիտուտների աշխատանքը բերվում է որպես օրինակ»,-ասաց Սիմոնյանը և կաևորեց, որ ՄԻՊ-ը, անկախ քաղաքական գործընթացներից, կարողանում է պահպանել չեզոքություն։
