Ամեն հաչող շան հետևից քար նետելով տեղ չենք հասնի. ընտրություն լինելու է: Այս մասին «Առաջին լրատվական»-ի հետ զրույցում նշեց ԱԺ Պետաիրավական հանձաժողովի նախագահ Վլադիմիր Վարդանյանը, ավելացնելով․ «Մենք փորձում ենք մնալ օրենսդրական կարգավորումների շրջանակում և գնալ առաջ»:
Անդրադառնալով Սերժ Սարգսյանի հարցազրույցին և Փաշինյանի երեկվա ելույթին, Վարդանյանը անընդունելի է համարում այն, որ սկսել են բանակցային գործընթացի մասին խոսել իշխող ուժին վնաս պատճառելու համար․ «Ներպետական հարցերը լուծելու համար բանակցային գործընթացը փոխհրաձգությունների հարթակ չէ: Ցանկացած քննադատություն հանդիպելու է կոնտր քննադատության»:
Հիշեցնենք, որ օրերս Սերժ Սարգսյանը հարցազրույց էր տվել և իշխանություններին մեղադրել բանակցությունները տապալելու մեջ, ինչին էլ ի պատասխան երեկ վարչապետի պաշտոնակատար Նիկոլ Փաշինյանը ԱԺ իր ելույթում արձագանքեց շատ կոշտ:
Վլադիմիր Վարդանյանի խոսքով՝ բոլոր քաղաքական ուժերի պատասխանատվության հարցն է հնարավորինս խուսափել մանիպուլյացիներից:
