Կառավարությունն այսօր հաստատել է «Հայաստանի ազգային պոլիտեխնիկական համալսարան» հիմնադրամի ռեկտորի պաշտոնում Գոռ Վարդանյանի ընտրության արդյունքները:
Հիշեցնենք, որ այս ընտրությունների շուրջ մեծ աղմուկ էր բարձրացել, քանի որ Հոգաբարձուների խորհրդում ռեկտորի ընտրությունից հետո ռեկտորի մյուս թեկնածուները բողոք էին ներկայացրել, իսկ նրանցից մեկը՝ Դավիթ Ղազարյանը, անգամ դիմել էր դատարան:
«Առաջին լրատվական»-ի հետ զրույցում Դավիթ Ղազարյանն ասաց, որ իր համար կառավարության որոշումը զարմանալի էր, բայց ոչ անակնկալ. «Ինձ համար շատ տարօրինակ և զարմանալի էր, բայց և սպասելի կառավարության գործելաոճը, երբ հինգշաբթի կառավարության նիստում Պոլիտեխնիկի ռեկտորի ընտրության հարցը օրակարգում չկար, բայց ուրբաթ օրը առանց հիմնավորումների որոշում է ներկայացվում և արդեն այսօր գրավոր ընթացակարգով հաստատում են ընտրության արդյունքները:
Ես մնում եմ իմ կարծիքին և ինչպես նշել էի դատական ճանապարհով առաջ եմ գնում: Ես հույս ունեմ, որ անաչառ դատական պրոցես կգնա և ի վերջո, ես կհասնեմ ռեկտորի ընտրությունների չեղարկմանը և նոր ընտրությունների նշանակմանը: Եթե նպատակահարմար լինի, հնարավոր է նաև կառավարությանը դատի տամ: Այդ հարցը դեռ քննարկում ենք փաստաբանների հետ»,-ասաց նա:
Նա կարծիք հայտնեց, որ թերևս կառավարությունը որդեգրել է գլխացավանքից ու շառից հեռու մոտեցում, որն իրականում շատ ավելի մեծ խնդրի առջև է բոլորին կանգնեցրել. «Եթե իրենք ուղղակի աղմուկից էին ուզում խուսափել, ապա այսպես շատ ավելի մեծ աղմուկի մեջ են ընկնելու: Գուցե դա ինչ-որ պայմանավորվածությունների արդյունք է, գուցե ներքաղաքական իրավիճակներն են ազդեցություն ունեցել, կամ գուցե ինչ-որ քաղաքական շահեր են, գուցե այլ կուսակցությունների հետ ինչ-որ միջնորդավորված թեկնածուներ են եղել, ես չեմ կարող ասել: Ես չեմ ուզում ավելի կտրուկ բաներ ասել, բայց գուցե կգա ժամանակը և ավելի շատ բաներ մանրամասներով կկարողանամ ասել»,-ասաց Դավիթ Ղազարյանը:
«Իմ պայքարը շարունակվում է, ուղղակի ափսոս, որ մեր ժամանակն է գնալու: Փաստորեն հիմա այդ անձին հաստատեցին ռեկտորի պաշտոնում և երբ ես դատական կարգով հասնեմ հաջողության, այդտեղ մի խնդիր էլ է առաջանալու. ո՞նց են էդ մարդուն գործից հանելու: Այսինքն նորանոր խնդիրներ են առաջ գալու, փաստորեն կառավարությունն ինքն իրեն ավելի բարդ խնդրի առջև է դրել»,-ասաց նա:
Դավիթ Ղազարյանն անդրադարձավ նաև բուհերի կառավարման խորհուրդների ձևավորման կարգը փոխելու վերաբերյալ օրենքի նախագծին, որով առաջարկվում է վերանայել և սահմանել ներկայացվածության հետևյալ բաշխվածությունը՝ հիմնադրի կողմից 55 տոկոս կամ 11 հոգի, պետական կառավարման լիազոր մարմնի կողմից` 10 տոկոս կամ 2 հոգի, բուհի պրոֆեսորադասախոսական կազմից՝ 10 տոկոս կամ 2 հոգի, ուսանողական համակազմի ներկայացուցիչներից՝ 25 տոկոս կամ 5 հոգի:
Դավիթ Ղազարյանն անտրամաբանական ու անհեթեթ է համարում, որ պրոֆեսորադասախոսական կազմից 2 հոգի պետք է լինի, իսկ ուսանողներից՝ 5. «Դա տրամաբանության մեջ չի տեղավորվում: Երևի ցանկացել են հիմնադիրն ու լիազոր մարմինը միասին մեծամասնություն ստանալ և իրենց համար ոչ ցանկալի ռեկտորների դեպքում կարողանան վերահսկելի դարձնել: Կառավարությունն ու նախարարությունն ընկած են խնդիրները քողարկելով, շատ ավելի վատ լուծումներ առաջարկելով: Ես չեմ հասկանում, թե մեր կառավարությունն ինչպես է մտածում»:
Հիշեցնենք, որ Պոլիտեխնիկի ռեկտորի ընտրությունների երկրորդ փուլի արդյունքներով ռեկտոր էր ընտրվել Գոռ Վարդանյանը, սակայն բանն այն է, որ ռեկտորի ընտրության արդյունքների մասին փաստող հաշվիչ հանձնաժողովի 5 անդամներից միայն երկուսն էին ստորագրել արձանագրության տակ, սակայն Հոգաբարձուների խորհրդին բանավոր հայտնել են, որ առկա է 3 ստորագրություն, և Հոգաբարձուների խորհուրդը 18 կողմ ձայնով հաստատել էր այդ «արձանագրությունը»:
