«Առաջին լրատվական»-ի հարցերին պատասխանել է Թբիլիսիի Black Sea Press գործակալության գլխավոր խմբագիր, քաղաքագետ Գելա Վասաձեն
Ռուսաստանից Հայաստան զրահաբաճկոններ տեղափոխող երկու բեռնատարները մոտ մեկ ամիս է` գտնվում են «Վերին Լարս» անցակետում։ Ձեր կարծիքով, ի՞նչ է տեղի ունենում, արդյոք դա պայմանավորված է ռուս-վրացական հարաբերություններով ու խնդիրներով:
Երկու բեռնատարների մասին ես չեմ լսել, բայց ինքնին տեղեկատվությունը տարօրինակ է: Վրաստանի օրենսդրության համաձայն արգելված է ՌԴ-ից ռուսական արտադրության ռազմական տեխնիկայի տեղափոխումը ցամաքային ճանապարհով: Եթե բեռը Հայաստանի համար է և արդեն հանդիսանում է Հայաստանի սեփականությունը, ապա այն կարող է տեղափոխվել միայն օդային ճանապարհով: իսկ եթե բեռը նախատեսված է ռուսական ռազմաբազայի համար և Ռուսաստանի սեփականությունն է, ապա նույնիսկ օդային ճանապարհով չի կարելի տեղափոխել:Այնպես որ այստեղ պետք է հստակեցնել, թե ինչ զրահատեխնիկա է տեղափոխվում:
Բայդենի կողմից Հայոց ցեղասպանության ճանաչումից հետո որքանո՞վ կարող է տարածաշրջանում նվազել Թուրքիայի դերակատարումը:
Դա չի կարող նվազեցնել Թուրքիայի դերը տարածաշրջանում: Ռուսաստանի հետ լարվածության ֆոնին Ադրբեջանում Թուրքիայի դերը կարող է միայն աճել: Մյուս կողմից հայ-թուրքական հարաբերությունների կարգավորման պրոցեսը չի սկսվել և դժվար թե սկսվի մինչև Հայաստանում ընտրությունները: Հետևաբար ոչինչ էլ չի փոխվի, այդ թվում Վրաստանում:
Ձեր կարծիքով այս ամենի ֆոնին ի՞նչ է փոխվում տարածաշրջանում:
Այս հարցին ես մասնակիորեն արդեն պատասխանեցի: Ցեղասպանության ճանաչումը քաղաքական պրոցեսի մաս է, սակայն դա արմատական առումով իրավիճակը տարածաշրջանում չի կարող փոխել:
Մոսկվան հայտարարեց, որ Ցեղասպանության ճանաչումը ԱՄՆ-ի ներքին գործն է: Ինչ է ցույց տալիս Կրեմլի այս ողորմելի արձագանքը:
Ինչո՞ւ ողորմելի, իմ կարծիքով Կրեմլը ողորմելի արձագանք չի տվել, առավել ևս, որ Ռուսաստանը վաղուց է ճանաչել Հայոց ցեղասպանությունը: Եթե դուք նկատի ունեք Մարգարիտա Սիմոնյանի և Կրեմլի այլ խոսափողների արձագանքը, ապա այստեղ էլ ամեն ինչ հասկանալի է. նրանց խնդիրն է մեղմել Հայաստանի բնակչության դրական արձագանքը Արևմուտքի և մասնավորապես ԱՄՆ-ի նկատմամբ: Նրանց համար Ամերիկան թշնամական պետություն է:
