Եվրամիությունը պետք է պարզի Վրբետիցայի զինամթերքի պահեստներում տեղի ունեցած պայթյունների մանրամասները, ՌԴ արտգործնախարարությունը կասկածներ ունի, որ Չեխիան խախտել է միջազգային պայմանագրերը: РИА Новости լրատվական գործակալության փոխանցմամբ՝ այս մասին հայտարարել է ՌԴ արտգործնախարար Սերգեյ Լավրովը: Նա չեխ քաղաքական գործիչների արձագանքն անվանել է «խճճված մեկնաբանություններ» և «էմոցիոնալ, ոչ խելամիտ հայտարարություններ»:
«Կան նաև լուրջ նշաններ, որ խախտվել են միջազգային կոնվենցիաները, այդ թվում՝ Օտտավայի կոնվենցիան, որն արգելում է հակահետևակային ականները, ինչպես նաև, այսպես կոչված, զենքի առևտրի պայմանագիրը, որի կողմ են հանդիսանում, որքան հասկանում եմ, Եվրամիության բոլոր անդամ երկրները», – ասել է Լավրովը:
Ավելի վաղ ՌԴ ԱԳՆ խոսնակ Մարիա Զախարովան Չեխիային կոչ էր արել անվանել այն բոլոր զինամթերքները, որոնք պահվում էին 2014 թ.-ին պայթած պահեստներում:
Չեխիայի նախագահ Միլոշ Զեմանը երեկ հատուկ հեռուստաուղերձով է հանդես եկել և հայտարարել, որ հակահետախուզության զեկույցում չկան ապացույցներ այն մասին, որ պահեստում եղել են արտասահմանյան հատուկ ծառայությունների աշխատակիցները:
Ըստ Չեխիայի նախագահի՝ միջադեպի հետաքննությունը դեռ ընթացքի մեջ է, ոստիկանությունը և գլխավոր դատախազությունն աշխատում են տեղի ունեցածի երկու վարկածի հետ՝ աշխատակիցների ոչ պրոֆեսիոնալ գործողություններ և օտարերկրյա հետախուզության գործունեություն:
Ավելի վաղ Չեխիայի վարչապետ Անդրեյ Բաբիշը զինամթերքի պահեստում տեղի ունեցած պայթյունի մեջ մեղադրել էր Մոսկվային: Կրեմլում այդ մեղադրանքներն անվանում են վրդովվեցնող և անհիմն:
