Սահմանադրական դատարանն օրեր առաջ որոշել էր կարճել ՀՀ նախկին գլխավոր դատախազ, Մարտի 1-ի գործով որպես մեղադրյալ ներգրավված Գևորգ Կոստանյանի դիմումի հիման վրա քննվող գործի վարույթը։ Այս մասին օրերս տեղեկացրել էր ՍԴ մամուլի խոսնակ Եվա Թովմասյանը՝ հավելելով, որ որոշումը կհրապարակվի եռօրյա ժամկետում։
Կոստանյանը, մասնավորապես, վիճարկել էր խափանման միջոց կիրառելու, որպես մեղադրյալ ներգրավելու հիմքերին եւ մեղադրյալի հետախուզմանը եւ Վերաքննիչ դատարանի լիազորություններին վերաբերող հոդվածները, մասնավորապես՝ ՀՀ քրեական դատավարության օրենսգրքի 135-րդ հոդվածի 1-ին մասը, 202-րդ հոդվածի 1-ին մասը, 259-րդ հոդվածի 2-րդ մասը, 394-րդ հոդվածի 2-րդ մասը, ՀՀ քրեական օրենսգրքի 308-րդ հոդվածի 2-րդ եւ 3-րդ մասերը, 75-րդ հոդվածի 3-րդ մասը։
Չսպասելով այդ ժամկետի ավարտին և ոոշման ամբողջական հրապարակմանը՝ Գևորգ Կոստանյանը լրատվամիջոցնրից մեկին որոշման մասին հարցազրույց էր տվել և նշել, որ Սահմանադրական դատարանն ըստ էության արձանագրել է, որ իր կողմից բարձրացրած հարցերը ոչ թե ՍԴ-ն պետք է քննի, այլ Վճռաբեկ դատարանը: Երեք օր անց Սահմանադրական դատարանի կողմից հրապարակված ամբողջական որոշման մեջ կարդում ենք այն ամենը, ինչ ասել էր Կոստանյանը։ Մասնավորապես Սահմանադրական դատարանն արձանագրել է, որ օրենքի, դրա որեւէ դրույթի իրավական բովանդակության բացահայտման և միատեսակ կիրառության ապահովման իրավազորությունը սահմանադրորեն վերապահված է եռաստիճան դատական համակարգին, և դիմողի կողմից բարձրացված՝ վերը նշված հարցը լուծելի է օրենքի միատեսակ կիրառման համապատասխան նախադեպի ձևավորմամբ։ Ելնելով վերոգրյալից էլ Սահմանադրական դատարանը որոշել է Կոստանյանի դիմումի հիման վրա գործի վարույթը կարճել։
Այս ամենը թերևս ապացուցում է, որ Գևորգ Կոստանյանը ծանոթ է եղել որոշմանը՝ դեռեւս պաշտոնապես չհրապարակված բովանդակությանը։
Փաստաբան, «Իրավունքի եվրոպա» ՀԿ նախագահ Լուսինե Հակոբյանն «Առաջին լրատվական»-ի հետ զրույցում ասաց, որ դա բնավ չի զարմացրել իրեն, այլ հիշեցրել է, թե ինչպես էին ժամանակին նույն Կոստանյանի մերձավոր շրջապատից ոմանք հրապարակում դեռ չհրապարակված Վենետիկի հանձնաժողովի որոշումներից հատվածներ իրենց ֆեյսբուքյան գրառումներով. «Նույն պատմությունն է, նույն սերիայից է։ Սա ցույց է տալիս, որ Սահմանադրական դատարանում կան դատավորներ, և հասկանալի է, թե նրանք ովքեր են, որոնք խորհրդակցական սենյակի գաղտնիությունը խախտում են և որոշումները դեռ չհրապարակած դրանց բովանդակության մասին տեղեկացնում են իրենց քաղաքական հայացքները կիսող դիմողներին»,-ասաց Հակոբյանը։
Նրա խոսքով՝ կատարվածը կարգապահական խախտում է և եթե Սահմանադրական դատարանի կազմն այլ լիներ, պետք է հստակ միջոցներ ձեռնարկվեին այդ դատավորներին բացահայտելու և կարգապահական պատասխանատվության ենթարկելու ուղղությամբ։ «Բայց քանի որ ՍԴ կազմն այն է, ինչ ունենք, ապա որևէ հույս ունենալ չի կարելի, որ այդ ուղղությամբ քայլեր կարող են ձեռնարկվել։ Նման երևույթները մեկ անգամ ևս գալիս են ապացուցելու, որ Սահմանադրական դատարանի հեղինակության բարձրացման ուղղությամբ ներկայիս կազմի մեծամասնությունը որևէ միջոցներ չի ձեռնարկում»,-ասաց Հակոբյանը։
Գևորգ Կոստանյանի պաշտպան Գևորգ Գևորգյանը «Առաջինլրատվական»-ի հետ զրույցում ասաց, որ այդ խնդրից տեղյակ չէ, տեղին չէ իր մեկնաբանությունը.«Եթե նման բան կա, կարծում եմ պարոն Կոստանյանը ինքը կմեկնաբանի, կպարզաբանի դա։ Իմ մեկնաբանությունը տեղին չի լինի»,-ասաց Գևորգյանը։
Լուսանկարը՝ Armeniasputnik-ի
