Զանգեզուրի միջանցքի ստեղծումը լիովին բավարարում է Ադրբեջանի ազգային, պատմական ու ապագա շահերին, հայտարարել է այդ երկրի նախագահ Իլհամ Ալիևն ադրբեջանական հեռուստատեսությանը տված հարցազրույցում։
«Մենք կիրագործենք Զանգեզուրի միջանցքի ծրագիրն անկախ նրանից` կուզի դա Հայաստանը, թե ոչ։ Եթե Հայաստանն ուզի, այդ հարցը պարզ կլուծվի, եթե չուզի՝ կլուծվի ուժով։ Ես ասում էի պատերազմի ժամանակ ու ասում եմ հիմա՝ նրանք պիտի «ռադ լինեն» մեր հողից բարի կամքով, թե չէ մենք նրանց դուրս կշպրտենք։ Այդպես էլ եղավ։ Նույնը լինելու է Զանգեզուրի միջանցքի հետ», – նշել է նա։
«Բոլոր ուժերը մոբիլիզացված են ծրագիրն իրագործելու համար։ Այսպիսով` 101 տարի անց ադրբեջանական ժողովուրդը վերադառնում է գրավված Զանգեզուր», – ասել է Իլհամ Ալիևը։
Պաշտոնական Երևանը խստորեն դատապարտել է Հայաստանի տարածքային ամբողջականության դեմ Ադրբեջանի նախագահի նկրտումները և ուժ կիրառելու սպառնալիքները: Այս մասին հայտարարել է Արտգործնախարարության խոսնակ Աննա Նաղդալյանը՝ պատասխանելով Իլհամ Ալիևի հայտարարության վերաբերյալ լրատվականների հարցին:
Արտգործնախարարության լրատվության և հանրային դիվանագիտության վարչության փոխանցմամբ՝ մեկնաբանելով Հայաստանի նկատմամբ ուժի կիրառման սպառնալիքները, որոնք Ադրբեջանի ղեկավարը հնչեցրել է իր երկրի հեռուստաընկերություններից մեկին տված հարցազրույցում, Նաղդալյանը շեշտել է. – «Նման հայտարարությունները լրջորեն վնասում են տարածաշրջանային խաղաղությանը և կայունությանը: Դրանք բացահայտում են խաղաղության և հաշտության վերաբերյալ վերջին ժամանակներում Ադրբեջանի հայտարարությունների սին և կեղծ բնույթը»:
Աննա Նաղդալյանը հավելել է. «Մենք մշտական կապի մեջ ենք մեր ռազմավարական դաշնակցի, ինչպես նաև Հարավային Կովկասում խաղաղությամբ շահագրգռված բոլոր գործընկերների հետ: Հայաստանը կձեռնարկի բոլոր անհրաժեշտ միջոցները՝ իր ինքնիշխանությունը և տարածքային ամբողջականությունը պաշտպանելու համար»։
Քաղաքագետ Լևոն Շիրինյանի խոսքերով՝ Ալիևը հերթական շանտաժն է անում.«Հաղթել են պատերազմում, մինչև ատամները զինված են, ունեն դաշնակիցներ, դրա համար էլ հավելյալ պահանջներ է ներկայացրել։ Ուժի վրա հենված շանտաժ է, որը վտանգավոր է»,-«Առաջին լրատվական»-ի հետ զրույցում ասաց քաղաքագետը։
Հայկական կողմի անելիքներն էլ, ըստ քաղաքագետի, պետք է լինի հետևյալը.«Ոչնչացնել մաֆիան տեղում, բանակը շատ արագ վերակազմավորել՝ փոխելով գեներալիտետին, բանակն էլ զերծ պահել օտար ազդեցություններից։Երբ հարմար եղավ՝ իրենք կդիմեն նոր ռազմական գործողությունների։ Ամերիկան խրվեց ընտրությունների մեջ՝ արեցին։ Գավառամիտ երեսուն տարվա հայկական ղեկավարությունն էլ երկիրը քանդել ու շարունակում է քանդել՝ հզորացնելով հակառակորդին։ Մեր աչքի առաջ է սա տեղի ունենում։ Ես որևէ մեկին պաշտպանելու խնդիր չունեմ, ես խոսում եմ պետության օգտին։ Որպես կանոն՝ ընտրություններից հետո իշխանության փոխանցումը տևում է վեց ամիս, գումարեք կորոնավիրուս ու պատերազմ։ Ի՞նչ եք որոնում։ Վեց ամսում սրանք գլուխները հանեցին ու սկսեցին երկիրը ցնցել։ Հակառակորդը լինի Ադրբեջանը, թե Իրանը կամ Ռուսաստանը, մենք պետք է նրա ասածներին լուրջ վերաբերենք։Ինքդ պետք է որպես պետություն լուրջ լինես։ Երբ լուրջ կլինես որպես պետություն ոչ մի հայտարարություն էլ չի լինի։ Ինչո՞ւ ենք զարմանում Ալիևի ասածներից։ Ընդհանրապես հայկական մտածողությունն ինձ համար զարմանալի է»։
Ինչո՞ւ Ալիևի սպառնալիքներին չի արձագանքում մեր խաղաղության երաշխավորը, հարցին ի պատասխան, մեր զրուցակիցն ասաց.«Ո՞վ է խաղաղության երաշխավորը՝ Ռուսաստա՞նը։ էլի ընկանք Բեռլինի պատերի տա՞կ։Ռուսաստանը Թուրքիայի հետ իր հաշիվներն է պարզում, մենք ի՞նչ ենք որոնում այստեղ։ Իրականությունը սա է։ Հային, որ ասում ես ՝ քո խնդիրը միայն քոնն է, խելագարության աստիճանի է հասնում։ Բայց սա է իրականությունը։ Ադրբեջանի տերն ո՞վ էր, որ 30 տարում բանակ վերազինեց։Երկու կլան իրար կպան ու արեցին։ Հիմա էլ ժողովրդին փորձում են համոզել, թե Ռուսաստանն այս իշխանությանը դեմ է, կողմ է Ռուսաստանին։ Ռուսաստանը կողմ է հարաբերականորեն, նա միայն անկայունություն է ուզում և այդ ճանապարհին կարող է օգտագործել բոլորին։Մեր երկրին պետք է ռազմական դեմոկրատիա։ Միայն դա է մեր փրկությունը։Աշխարհասփյուռ հայության հետ պետք է լինենք մի ամբողջություն՝ ցանցային պետություն։ Հերիք է օգտագործեք տերմինը, թե Ռուսաստանը մեր հովանավորն է։ Նա միայն հովանավորեց Արցախի հանձումն Ադրբեջանին։ Մարդիկ քվեարկում են հայ ռազմագերիների վերադարձի դեմ, էլ ի՞նչ հարցեր կարող են առաջանալ։ Ընկել հովանավոր եք որոնում, ձեր հարցերն ինքներդ լուծեք։ Երբ կլուծեք՝ այն ժամանակ էլ կապրեք»։
