Իշխանությունները պարտավոր են նախընտրական շրջանում պատասխանել մի շարք հարցերի, որոնք հարցականների տեսքով պտտվում են հասարակության գլխում։ Այս մասին ԱԺ նիստում ասաց «Լուսավոր Հայաստան» խմբակցության պատգամավոր Աննա Կոստանյանը։
«Պատերազմի հետևանքների և դրա պատճառների հանդեպ անողոք ենք լինելու։ Նախ, պատերազմից առաջ անհասկանալի՝ «ինչ ուզում ենք կամ ինչ պետք է, այն էլ բանակցում ենք» դիվանագիտությունը, որին հաջորդեց պատերազմը, ընթացքում ոչ ադեկվատ ազդակներն ու թմրեցնող քաղաքականությունը, ինֆորմացիոն բլոկադան, նոյեմբերի 9-ի անսպասելի հայտարարության կնքումը ժողովրդի մեջքի հետևում, որի իրավունքը չունեիք պարզապես՝ առանց քննարկելու ժողովրդի ներկայացուցիչների հետ։ Հետո սահմանազատում՝ անհասկանալի GPS-ներով, ոչ հայանպաստ պայմաններով, անհասկանալի քարտեզներով, մարդկանց խուճապ, այս պրոցեսի անհեռանկար շարունակություն Հայաստանի սահմաններին։ Իրավունք չունեք պարզապես թաքցնելու որևէ գործընթաց ժողովրդից»,- ասաց Կոստանյանը։
Նա հավելեց, որ Հայաստանի իշխանություններն անատամ ու անահամաչափ արձագանք են տալիս այսօր թուրք-ադրբեջանական ռազմաքաղաքական վերնախավի կողմից հնչեցվող հայտարարություններին։
«Եթե չեք կարողանում դիվանագիտորեն համարժեք լեզվով խոսել, ապա, կարծում եմ, պետք է մի կողմ քաշվեք և թողնեք խոսեն նրանք, ովքեր կարող են խոսել։ Իսկ ո՞վ է ասել, որ պատերազմում կամ դրանից հետո և այն էլ 21-րդ դարում պիտի անողանաշար ու ծուռվիզ կեցվածքով հանդես գանք աշխարհին։ Մանիպուլյացիաներով ու ժողովրդահաճո խոսքերով այլևս հնարավոր չէ կուրացած ու թմրեցված պահել ժողովրդին։ Բավ է մեղավորներ փնտրել նախկինների կամ դրանց նախկինների մեջ, քանի որ պատերազմի առնվազն մեկնարկի և դրա ողբերգական ավարտի թիվ մեկ պատասխանոտւն առաջին հերթին դուք եք, քանի որ կարող էիք այն կանախտեսել, կանխել, բայց չեք արել»,- հավելեց նա։
Ըստ Կոստանյանի՝ խորհրդարանական մեծամասնությունը պարտավոր է նախքան ընտրությունները քաղաքական գնահատական տալ վարչապետի իրարամերժ հայտարարություններին։ Սա շատ կարևոր չափորոշիչ է լինելու քաղաքացիների կողմնորոշման համար։
