Ադրբեջանական Salam News գործակալության փոխանցմամբ՝ Ադրբեջանի քաղբանտարկյալների գծով ԵԽ-ի զեկուցող Քրիստոֆեր Շտրասերը նոյեմբերին այցելելու է Բաքու։ Այս մասին լրագրողներին հայտարարել է լրագրող Էյնուլա Ֆաթուլաևը։
Վերջինիս խոսքերով՝ նոյեմբերին Բաքվում տեղի է ունենալու «Ադրբեջանում մարդու իրավունքների ներկայիս օրը» խորագրով միջազգային կոնֆերանսը, որին աջակցում են Ֆաթուլաևի հիմնադրած «Մարդու իրավունքների հասարակական շարժում» կազմակերպությունն ու ԵԽ-ի քարտուղարությունը։
Ըստ Ֆաթուլաևի՝ ակնկալվում է, որ կոնֆերանսին մասնակցելու են Բաքվում օտար դեսպանատների, քաղաքացիական հասարակության ու քաղաքական կուսակցությունների ներկայացուցիչները։ Կոնֆերանսի օրակարգն օգոստոսի վերջին կուղարկվի Ստրասբուրգ։
Ֆաթուլաևն ընդգծել է, որ եթե Ադրբեջանում լուծում չստանա քաղբանտարկյալների հարցը, ապա ԵԽ-ը ձմեռային նստաշրջանի ժամանակ որոշում կընդունի տվյալ խնդրի շուրջ։ Մասնավորապես՝ Ֆաթուլաևը կարծում է, որ Շտրասերը կոնկրետ դիրքորոշում ունի տվյալ խնդրի նկատմամբ։
Հիշեցնենք, որ Ֆաթուլաևը ներկայացնում է 2005-2010 թվականներին Ադրբեջանում ձերբակալված քաղբանտարկյալների սերունդը (2007), երբ քաղաքական նկատառումներով ադրբեջանական բանտերում հայտնվեցին 35 հասարակական գործիչներ։
