Նախընտրական այս շրջանում շատերը սկսել են հղում կատարել էպոսին, հեքիաթներին: «Առաջին լրատվական»-ի հետ զրույցում PR մասնագետ, հեքիաթասաց Հայկ Կիրակոսյանը նշեց, որ դեռևս մի քանի տարի առաջ կանխատեսել է՝ կգա ժամանակը, և բոլոր հնարավոր ուժերը պատեհ-անպատեհ կխոսեն էպոսից, մեջբերումներ կանեն հեքիաթից, և հեռու չէ այն օրը, որ ամբողջ Ազգային ժողովը հեքիաթ է կարդալու. խոսքը մաքրամաքուր հեքիաթների մասին է, ոչ թե սուտ խոստումների ու մանևրների:
«Տեսնում ենք, որ տարբեր ուժեր սուր հոտառություն ունեն և նկատում են օդում կախված ազգայինի, ազգային առաջնորդի պահանջարկը, բայց նրանցից շատերը բավականին հեռու են այդպիսին լինելուց»,-նշեց Կիրակոսյանը՝ տեղեկացնելով որ արդեն երեք ուժերի կողմից հրավեր է ստացել իրենց ընտրացուցակներով մասնակցել առաջիկա ընտրություններին. «Եթե այնտեղ ուժ տեսնեի, կամ գոնե ազգային մարդկանց խումբ, որևէ կերպ կփորձեի օգտակար լինել՝ անկախ ընտրացուցակներում ներգրավվելուց»:
«Մի քանի հասկացություններ պարզաբանման կարիք ունեն. նախ ընտրություն բառը հայերենում ունի ընտիր արմատը. այն քաղաքական առաջարկը, որ դրված է հայ մարդու առաջ, այնտեղ կա՞ ընտիրություն:
Կարելի է խաղատախտակից հեռանալ, ես միտումնավոր, հստակ նպատակադրումով չեմ մասնակցելու ընտրություններին»,- նշեց Կիրակոսյանը:
Նրա դիտարկմամբ՝ Ազգային ժողովը վաղուց վեր է ածվել կուսակցական ժողովի, որտեղ կա միայն կուսակցական շահ, և չկան ազգային գործիչներ:
«Այս անգամ մեր պառլամենտը ջոկերային է լինելու, այսինքն՝ այնտեղ հանդես են գալու պատգամավորներ, որոնք ջոկերի կարգավիճակ են ունենալու՝ տարբեր ուժերի մեջ, նրանք ծանոթներով, ընկերական կապերով հայտնվելու են պառլամենտում և ճիշտ պահին ջոկերի պես փոխելու են իրենց գույնն ու դեմքը և կանգնելու են մեկ ուրիշ ուժի կողքին՝ անկախ նրանից, թե որ քաղաքական ուժի կազմում են հայտնվել ԱԺ-ում: Այդպիսի մարդկանց մեծ հոսք կա»,- նշեց Կիրակոսյանը:
Մեր զրուցակցի կարծիքով, ճիշտ կլինի հիմնել այլընտրանքային Ազգային ժողով, որտեղ կլինեն ոչ կուսակցական ազգային գործիչներ, նաև սփյուռքահայ գործիչներ: Եվ այլընտարնքային ԱԺ-ն կարող է ազդեցություն ունենալ ԱԺ որոշումների կայացման հարցում:
«Մեր էպոսում Սասունցի Դավիթը ասում է. «Ով քնած է, արթուն կացեք»: Դավիթը արթնություն է բերում, իսկ երբ Մսրա Մելիքը արթնանում և փչում է նրա վրա, դրանից հետո Դավիթը նույնպես քնի մեջ է ընկնում, խաբվում է, գնում է Մելիքի հետ հաց ուտելու և հորի մեջ է հայտնվում: Իշխանություն, ընդդիմություն. սրանք բոլորը զոհեր են՝ հակահամակարգի՝ «քնավարակի» զոհեր:
Մանրամասն՝ տեսանյութում: