Չարենցի տուն-թանգարանի հենց դիմաց ընկած այգում ընթանում է շինարարություն։ Երբ «Առաջին լրատվականը» այցելեց այգի, հատուկ մեքենաները արմատախիլ էին անում երկու հաստաբուն ծառ և քանդում հարակից բետոնային սալահատակը։
Ինչպես հաղորդեցին շինարարները, նախատեսվում է այգու տեղում կառուցել ավտոճանապարհ, որը կմիացնի Սարյան և Կողբացի փողոցները։ Այս ծրագրի նպատակը քաղաքի այդ կենտրոնական հատվածում երթևեկությունը թեթևացնելն է։
«Այս նոր ճանապարհը ոչինչ չի տա մեր քաղաքին, սա ինչ-որ մարդկանց քմահաճույքով է արվում։ Մեր թանգարանի համար ամենածանրաբեռնված ժամանակահատվածն է շուտով սկսվելու։ Սեպտեմբերից դեկտեմբեր ամիսներին ամբողջ հանրապետությունից՝ դպրոցներից, համալսարաններից երեխաների խմբեր են գալիս, նույնիսկ հերթեր են գոյանում։ Հիմա երեխաները կանգնելու տեղ էլ չեն ունենա»,- ասաց Չարենցի թանգարանի տնօրեն Լիլիթ Հակոբյանը և անհանգստություն հայտնեց, որ թանգարանի մուտքը անմիջապես ավտոճանապարհի վրա բացվելով վտանգավոր կլինի՝ հատկապես երեխաների համար։
Հակոբյանը այս հարցով տևական ժամանակ առաջ դիմել է քաղաքապետարան, սակայն ոչ մի պատասխան չի ստացել։
Թանգարանի տնօրենին հաջողվել է փրկել թանգարանի առջևում տնկած ծառերից մեկը՝ Կարսից բերված եղևնին, այն անմիջապես մուտքի կողքը տեղափոխելով։
Այգու միջով ավտոճանապարհ կառուցելուն դեմ են նաև հարակից շենքի բնակիչները։ Նրանք անհանգստացած են, որ իրենց փոքրիկ երեխաներն այլևս տեղ չեն ունենա խաղալու և շենքից դուրս գալով կհայտնվեն ավտոմեքենաների ճանապարհին։
