Թուրքական Haber 3 կայքի փոխանցմամբ՝ ադրբեջանական մեծաթիվ բնակչություն ունեցող Իգդիրում գործունեություն ծավալած, այսպես կոչված՝ «Հայկական անհիմն պնդումների դեմ պայքարի միությունը» (ASİM-DER) Ներքին գործերի նախարարությանն ուղարկած իր նամակում կոչ է արել Թուրքիայից արտաքսել ապօրինի բնակվող հայերին։
Այս մասին հայտարարել է ASİM-DER-ի մամլո խոսնակ Էրհան Հաջըքասըմօղլուն. «Թուրքիայում ապօրինի բնակվող հայերն ու հայ զբոսաշրջիկներն ազատորեն շրջում են մեր երկրում։ Հանդիսանալով հասարակական կազմակերպություն՝ մենք անհանգստացած ենք նրանից, որ մեր երկրում ազատորեն շրջելուց և այն լքելուց հետո հայերը սկսում են զբաղվել թուրք ազգի ու պետության դեմ հակաքարոզչությամբ։ Հրանտ Դինքի սպանությանը հաջորդած ստամբուլյան ցույցերը, որոնց կարգախոսն էր՝ «Մենք բոլորս հայ ենք, մենք բոլորս Հրանտ ենք», ցույց տվեց մեր երկրում ապօրինի բնակվող հայերի ստվար լինելը։ Հայ հարուստ գործարարներն իրենց հովանավորության տակ են վերցնում Թուրքիայում ապօրինի բնակվող հայերին։ Հայաստանի նախագահ Սերժ Սարգսյանն ամեն առիթով հակաթուրքական կոչեր է հնչեցնում»։
Հիշեցնենք, որ օրեր առաջ էլ ASİM-DER-ն Ալիջանի սահմանակետում բողոքի ակցիա էր կազմակերպել՝ ընդդեմ Հայաստանի նախագահ Սերժ Սարգսյանի ծաղկաձորյան հայտնի հայտարարության։ Ցուցարարները «զինված են» եղել «Մարդասպան Սարգսյան» պաստառներով և այրել են Սերժ Սարգսյանի նկարները։
Ինչ վերաբերում է Թուրքիայում ապօրինի բնակվող հայաստանցիների արտաքսմանը, ապա Թուրքիայի վարչապետ Էրդողանը երկու անգամ՝ նախորդ և այս տարի, սպառնացել է Թուրքիայից վտարել նրանց։
