Հունական պարբերականներից մեկում օրերս հրապարակված հոդվածը, որտեղ նշվում է արցախյան պատերազմի վերսկսման հավանականության մասին, կրքեր է բորբոքել հայաստանյան վերլուծական շրջանակներում:
Թեմայի շուրջ «Առաջին լրատվական»-ի հետ զրույցում Քաղաքական գիտության Հայաստանի ասոցիացիայի գործադիր տնօրեն Բենիամին Պողոսյանը նշեց. «Պատերազմի վերսկսում, այսինքն՝ լայնածավալ հարձակում, այն, ինչ տեսանք 2020թ. սեպտեմբերից Արցախում, շատ քիչ հավանական է, և չեմ կարծում դա Թուրքիային և Ադրբեջանին, առավել ևս Ռուսաստանին պետք է, որևէ մեկին պետք չէ: Սակայն չպետք է մոռանանք, որ ներկայումս պատերազմ ասվածը շատ հարաբերական է և լղոզված է, տարատեսակ հիբրիդային պատերազմներ կան, որոնց դեպքում պարտադիր չէ հայտարարել պատերազմի մասին կամ նույնիսկ լայնածավալ ռազմական գործողություններ սկսել, սակայն հնարավոր է իրականացնել ինչ-որ քայլեր: Այդպիսի իրավիճակներ շատ կան՝ սկսած Սիրիայից մինչև Ուկրաինա, որտեղ դժվար է հասկանալ պատերազմ է թե չէ, սակայն փաստացի տեղի են ունենում որոշակի գործողություններ, որոնք բերում են ստատուս քվոյի փոփոխման:
Այդ առումով մենք պետք է միշտ պատրաստ լինենք, որովհետև հատկապես Թուրքիան բավականաչափ փորձ ունի հիբրիդային պատերազմ մղելու: Ոչինչ չի խանագարում, որ Թուրքիան նմանատիպ գործողություններ իրականացնի նաև Հայաստանի դեմ: Օրինակ՝ Սյունիքում տեղի է ունենում դեմարկացիա և դելիմիտացի, որքան էլ պնդեն, որ այդպես չէ, փաստացի սահմանների ճշգրտումներ են կատարվում… Կարող են այնտեղ զորքերի որոշակի շարժ անել կամ սադրանքներ ու պրովոկացիաներ կազմակերպել… Չի բացառվում, որ Թուրքիան ու Ադրբեջանը որոշակի գործողություններ իրականացնեն, որից հետո հանդես գան հերքումներով»:
«Քաղաքացու որոշում» կուսակցության անդամ, իրավաբան Նարեկ Ներսիսյանը նշեց, որ հնարավոր է լավ պլանավորած մեկ ծրագիր է իրագործվում, որի երկրորդ փուլը կարող է լինել հիբրիդային պատերազմը. «Հստակ է, որ պատերազմ չլինի, ռազմական գործողություններ կլինեն, և դրանք կունենան հետևանքներ, մարդկային կորուստներ կլինեն»:
«Հանուն հանրապետության» ԺՊԴԿ անդամ, փաստաբան Արտաշես Խալաթյանը նշեց, որ հաշվի առնելով Հունաստանի դիրքավորումը ընդդեմ Թուրքիայի և Հայաստանի հետ պատմական ջերմ հարաբերությունները, չի բացառվում, որ պարբերականի այս հրապարակումը որոշակի զգուշացում է մեզ՝ աչալուրջ լինելու համար: «Մյուս կողմից՝ մենք ավանդաբար Ալիևի խոսքերին և թուրքական հռետորաբանությանը հետևելու փոխարեն այլ տեղերից ստացվող մեսիջներն ենք մեկնաբանում: Ակնհայտ է, որ այսօր Հայաստանի վրա որոշակի ճնշումներ են բանեցնում, տրանսպորտային կոմունիկացիաների ապաշրջափակում անվան ներքո շատ ավելի մեծ զիջումների մղելու համար:
«Հայկական կողմի թողտվության պայմաններում Արցախյան ինքնապաշտպանական ուժերի պարտությունը հաջողությամբ բարդվեց Հայաստանի վրա, Հայաստանն էլ ընդունեց, որ ինքը պարտված կողմ է, և որպես պարտված կողմ նրա վրա տարատեսակ անհամաչափ ճնշումներ են գործադրվում՝ արդեն բուն հայկական տարածքներից զիջումների մղելու նպատակով:
Չի բացառվում, որ նաև ներքին քաղաքական սրացումներն ունենան արտաքին քաղաքական փոխառնչութուններ: Ռուսաստանի դերն այստեղ երկիմաստ է»,- նշեց Խալաթյանը՝ ընդգծելով, որ պատերազմական ներխուժումը բացառում է, բայց Հայաստանի տարածքի նկատմամբ հանարավոր է ոտնձգություններ լինեն:
Մանրամասն՝ տեսանյութում:
