«Այդ տարընթերցումները պարզունակ սոփեստություն են»,- «Առաջին լրատվական»-ի հետ զրույցում այս մասին նշեց փաստաբան Տիգրան Եգորյանը՝ անդրադառնալով հարցին, թե արդյոք Գլխավոր շտաբի հայտարարության (որով պահանջվում էր կառավարության և վարչապետի հրաժարականը) հետևանքով առաջացած խնդիրն ունի՞ հստակ սահմանադրական լուծում՝ առանց տարընթերցումների: «Եթե խնդիրը տրամաբանության, սթափ դատողության և ճգնաժամերը լուծելու շրջանակներում հաղթահարելի է, ապա չկա տարընթերցում: Գործ ունենք սոփեստությանը զոհ գնալու հետ: Խնդիրը հանգուցալուծում է Սահմանադրությունը: Իրավական մտքի տեսանկյունից անբովանդակ է այն փաստարկը, որ Սահմանադրության մեջ բառացի նշված չէ «վարչապետը ազատում և նշանակում է»: ԳՇ պետ նշանակելու իրավասությունը բացառապես պատկանում է վարչապետին»,- նշեց փաստաբանը:
«Իրավունքի Եվրոպա» ՀԿ նախագահ, փաստաբան Լուսինե Հակոբյանը հավելեց, որ Սահմանադրության 155-րդ հոդվածի համաձայն՝ Զինված ուժերը գտնվում են կառավարության ենթակայության ներքո, պատերազմական իրավիճակում գերագույն հրամանատարը վարչապետն է, ոչ պատերազմական իրավիճակում պաշտպանության նախարարը, և այդ կարգավորումներից բխում է նաև, որ վարչապետն ունի ԳՇ պետ ազատելու և նշանակելու լիազորություններ:
«ԳՇ հայտարարությունը երկու հանցակազմ էր պարունակում, որը փորձել են սքողել քվազի իրավական պրոցեսներով»,- նշեց Տիգրան Եգորյանը: Անդրադառնալով նախագահի քայլերին, Եգորյանը կարծիք հայտնեց, որ նախագահը քաղաքական նպատակներ է հետապնդում:
Լուսինե Հակոբյանն ընդգծեց, որ ԳՇ քայլը լավ չմտածված, մեկքայլանի օպերացիա էր. «Եթե մեր գեներալիտետը հայտարարություն է անում և հետագա քայլերի մասին պլան չունի, ապա զարմնալի չէ, որ պատերազմում էլ նման մասշատբի պարտություն ունեցանք»:
Մանրամասն՝ տեսանյութում:
