Թուրքիայի արտգործնախարար Մևլյութ Չավուշօղլուն Ղրղզստան այցի ժամանակ հայտարարել է, որ տարածաշրջանային և արցախյան թեմաններն իրենց համար շատ կարևոր ու առաջնային են։ Նա մասնավորապես նշել է, որ Թուրքիան պատրաստ է խոսել այն երկրների հետ, որոնց համար շատ կարևոր է կայունության ու խաղաղության գաղափարը Կովկասում։
Առաջին անգամը չէ, որ Թուրքիայից ամենաբարձր մակարդակով նման հայտարարություններ են հնչում։ Այս դեպքում ի՞նչ պետք է անի Հայաստանը՝ զգուշությո՞ւն ցուցաբերի, թե՞ արձագանքի այս ուղերձին․ «Առաջին լրատվական»-ի հարցին վերլուծաբան Արեգ Քոչինյանը պատասխանեց․ «Թուրքիայի արած հայտարարությունները պետք է հասկանալ հետևյալ տրամաբանության մեջ։ Ըստ էության՝ Թուրքիային և կովկասյան իր դաշնակցին հաջողվել է բռնի ուժի կիրառմամբ տարածաշրջանում փոփոխության ենթարկել ստատուս-քվոն։ Այժմ նրանք ունեն մեկ առաջնահերթություն՝ այդ ստատուս-քվոյի փոփոխության ամրագրումը միջազգային հարաբերությունների դաշտում և աշխարհաքաղաքական գործընթացներում։ Դրա համար անհրաժեշտ է որոշակի կայունություն։ Այսինքն՝ այն բռնությունները, որոնք կիրառվեցին Արցախի և Հայաստանի դեմ, և այն հաջողությունները, որ նրանք գրանցեցին այդ բռնության միջոցով, այժմ նրանց պետք է լինելու որոշակի կայունություն, որպեսզի այն նվաճումները, որոնք նրանք կարողացել են ունենալ, աշխարհաքաղաքական սեղանի վրա կարողանան ամրագրել որպես ձեռքբերում»։
Իսկ «Հանուն Հանրապետության» կուսակցության ղեկավար մարմնի անդամ Ռոբերտ Ղևոնդյանն ասաց․ «Ցավոք սրտի, մենք սուբյեկտայնության որոշակի կորուստ ենք ունեցել տարիների ընթացքում, և դա ավելի մեծ չափով զգացվեց պատերազմից հետո՝ պայմանավորված պատերազմով։ Թուրքիայի և Ադրբեջանի հետ հարաբերությունները միշտ տեղի են ունեցել Ռուսաստանի միջոցով, ինչն էլ ուղղակիորեն ազդել է այդ հարաբերությունների որակի վրա։ Իհարկե, ես հեռու եմ այն մտքից, որ կարելի էր բարիդրացիական հարաբերություններ հաստատել Թուրքիայի և Ադրբեջանի հետ, ինչպես նշում են որոշ քաղաքական մոտեցումներ ունեցողներ, սակայն տարիների ընթացքում Հայաստանը կարող էր ու պարտավոր էր անձամբ փորձել հարցեր կարգավորել այդ երկրների հետ։ Ցավոք սրտի, մենք այդ իրավունքը պատվիրակել էինք Ռուսաստանին, և Ռուսաստանը, ինչպես ենթադրելի էր, այդ գործընթացի մեջ իր շահն էր ավելացրել»։
Մանրամասները՝ տեսանյութում։
