Անհանդուրժողականությունն առկա է գրեթե բոլոր ոլորտներում, անգամ ակադեմիական և փորձագիտական շրջանակներում են անհանդուրժողական տեքստեր հնչում: Ինչո՞վ է սա պայմանավորված: «Առաջին լրատվական»-ի հետ զրույցում անդրադառնալով այս հարցին, մշակութային մարդաբան Աղասի Թադևոսյանը նշեց, որ այս խնդիրը, լայն առումով, մշակութային դաշտում է գտնվում. «Նկատի ունեմ հատկապես միջանձնային հարաբերությունների մշակույթը հասարակությունում և դաստիարակությունը»:
«Մեր հասարակության վրա դրոշմ է թողել նաև խորհրդային շրջանը. ընդհանրապես խիստ գաղափարականացված հասարակությունները աշխարհը տեսնում են երկու բևեռի մեջ: Երբ երևույթները գերազանցապես դասակարգում ենք սևի կամ սպիտակի մեջ, այդ դեպքում միջակայքի գունագեղությունը մեզ համար դառնում է անհանդուրժելի:
Անկախության տարիներին զարմանալիորեն մեր հասարակությունն ավելի շատ ձևավորվեց որպես ռեակցիոն-պահպանողական, քան պրոգրեսիվ-առաջադիմական: Պատճառը հիմնականում վախն է, և դրա հրահրողները եղել են նախկին քաղաքական էլիտաները: Քիչ թե շատ ազատական, առաջ նայող էլիտա ունեցել ենք 91-95 թթ-ին:
Խնդիրն այն է, որ Հայաստանում խոշոր կապիտալի ստեղծման պրոցեսներին մասնակցում էին գերազանցապես տգետ ճարպիկները: Բիրտ ուժով, անմակարդակությամբ ու բթությամբ իրենց ճանապարհը հարթած մարդիկ դարձան խոշոր փողատերեր: Եվ հասարակության մեջ մշակույթ ձևավորող, ինքնությունը դինամիկ կերպով վերաիմաստավորող շերտերը սկսեցին պիտակավորվել որպես ապազգայիններ:
Այդտեղից էլ գալիս է տոտալ անհանդուրժողականությունը կիրթ, զարգացած, առաջադեմ մարդկանց հանդեպ: Եվ մեր դժբախտությունն այն է, որ այդ կիրթ մարդիկ չեն հայտնվում վերնախավերում»,- նշեց Թադևոսյանը:
Անդրադառնալով դիտարկմանը, որ հանրահավաքների բազմամարդությունը դարձել է քաղաքական ուժի աջակցության չափման միավոր, սակայն քաղաքացիների մեծ մասը չի մասնակցում հանրահավաքներին, մշակութային մարդաբանը նկատեց, որ հասարակության զգալի հատվածը չի համակրում ո՛չ իշխանությանը, ո՛չ ընդդիմությանը:
«Ռացիոնալ մարդիկ այսօր փողոցում միտինգների չեն մասնակցում, այլ կա՛մ տանն են, կա՛մ գործ են անում: Մարդիկ չեն արձագանքում, որովհետև տեսլականներ ու գաղափարներ են ուզում: Մարդկանց անհրաժեշտ է մի ուժ, որը խոսք կտա ձևավորել այնպիսի միջավայր, որտեղ հնարավոր կլինի արարել, ստեղծել ու ստեղծագործել»,- նշեց Թադևոսյանը:
Մանրամասն՝ տեսանյութում: