Ռուսական Regnum գործակալության փոխանցմամբ՝ արդբեջանցի քաղաքագետ Վաֆա Գուլուզադեն մեկնաբանել է Ռուսաստանի նախագահ Դմիտրի Մեդվեդևի այն հայտարարությունը, որում նա նշել է, թե 2008 թվականին Ռուսաստանի կողմից Հարավային Օսիայում իրականացված և Վրաստանին խաղաղության հարկադրելուն ուղղված գործողությունը «լուրջ դաս» է եղել Հայաստանի ու Ադրբեջանի համար, ովքեր Լեռնային Ղարաբաղի պատճառով գտնվում են միմյանց հետ հակամարտության մեջ.
«Այդ հայտարարությամբ Մեդվեդևն իր վրայից հանեց խաղաղարարի դիմակը և, ըստ էության, Ադրբեջանին սպառնաց Ղարաբաղում ռազմական գործողությունների վերսկսման պարագայում վրացական իրադարձությունների կրկնմամբ։
Ըստ էության, Դմիտրի Մեդվեդևը խոստովանեց, որ Լեռնային Ղարաբաղի «օկուպացիայի» ետևում կանգնած է հենց Ռուսաստանը։ Նա Ադրբեջանին սպառնում է օգոստոսյան իրադարձությունների կրկնմամբ, փոխանակ դա անի Հայաստանի պարագայում։
Իրականում Ռուսաստանը շահագրգռված չէ հակամարտության լիակատար կարգավորմամբ, քանի որ դա նրան հնարավորություն է ընձեռում մշտապես վերահսկել թե՛ Հայաստանին, թե՛ Ադրբեջանին՝ դրանով իսկ կանխելով այդ երկրներում արևմտյան ազդեցության մեծացումը։ Ռուսաստանի միջնորդական ակտիվությունը ոչ ավելին է, քան միայն պատրանք։
Մեդվեդևի հայտարարությունը վկայում է այն մասին, որ Ռուսաստանը կոշտացնելու է իր դիրքորոշումն Ադրբեջանի նկատմամբ։ Մոսկվան զայրացած է նրանից, որ Ադրբեջանը շարունակում է իր արևմտամետ քաղաքականությունը, իսկ ժամանակի ընթացքում է՛լ ավելի է ամրագրվում Ադրբեջան-ՆԱՏՕ համագործակցությունը։ Մոսկվայում զգում են, որ այդ ամենն ավարտվելու է ՆԱՏՕ-ին Ադրբեջանի անդամակցությամբ։
Բացի այդ, Ռուսաստանը բարկացած է Ադրբեջանի վրա նաև նրա համար, որ նա տվել է իր համաձայնությունը Ռուսաստանի տարածքը շրջանցող Nabucco գազատարի նախագծին մասնակցելու համար։ Հայտնի է, որ Ռուսաստանն Ադրբեջանին առաջարկել է իրեն հանձնել (վաճառել) ողջ ադրբեջանական գազը, սակայն Ադրբեջանը հրաժարվել է այդ առաջարկից։ Այնպես որ մենք դեռ երկար նմանատիպ հայտարարություններ կլսենք ռուսական ղեկավարությունից»։
Գուլուզադեին հարցրել են, թե հնարավո՞ր է, որ հետագայում Ռուսաստանը ճանաչի Լեռնային Ղարաբաղի անկախությունը, ինչպես որ վարվել է Աբխազիայի ու Հարավային Օսիայի պարագայում, ինչին ադրբեջանցի քաղաքագետը բացասական պատասխան է տվել.
«Ռուսաստանն այդ մասին սպառնալիքներ կհնչեցնի, սակայն դա չի նշանակում, թե երբևէ կվարվի այդ կերպ։ Մոսկվան փորձելու է շահարկել այդ գործոնը՝ քաղաքական ճնշում գործադրելով ադրբեջանական ղեկավարությանը»։