Փետրվարի 10-ին Թուրքիայի զինուժի կողմից «Քուրդիստանի բանվորական» կուսակցության (ՔԲԿ) դեմ Իրաքյան Քուրդիստանի (Հյուսիսային Իրաքի քրդական ինքնավար շրջան) Դոհուկ նահանգի Գարա շրջանում մեկնարկած «Արծվի մագիլ 2» (Pençe-Kartal-2) ռազմագործողությունները շարունակվում են, հայտնում է «Էրմենիհաբերը»:
Քրդական ANF News լրատվական կայքի փոխանցմամբ, թուրքական օդուժը Kobra տեսակի 5 հարվածային ուղղաթիռներով և Sikorsky տեսակի 2 ռազմատրանսպորտային ուղղաթիռով փորձել է լրացուցիչ դեսանտներ իջեցնել Գարայի շրջան, սակայն չի հաջողել:
Նշվում է, որ քուրդ զինյալների բացած կրակից թուրքական ուղղաթիռները լքել են տարածքը:
Օպերացիայի առաջին օրը հարվածային ուղղաթիռներով Գարայի շրջան իջեցված թուրք դեսանտների և քուրդ զինյալների միջև տեղի ունեցած բախումների հետևանքով, Թուրքիայի պաշտպանության նախարարության հաղորդմամբ, թուրք 3 զինվորական էր սպանվել, ևս 3-ը վիրավորվել են: Իսկ քրդական աղբյուրների հաղորդմամբ՝ «Արծվի մագիլ 2» ռազմագործողության ընթացքում թուրքական ԶՈՒ-ի 9 զինվորական է սպանվել:
