Վերջին շրջանում հանդիպումները իրանցի տնտեսվարողների հետ շատացել են, վերջերս նաև Իրանում տնտեսական համաժողով է անցկացվել, որտեղ նաև հայ գործարարների են հրավիրել, իրանական ապրանքներն են ցուցադրել: Այդ մասին «Առաջին լրատվական»-ի հետ զրույցում նշեց իրանագետ Արմեն Վարդանյանը՝ անդրադառնալով նրան, որ վերջերս Իրանում ՀՀ դեսպանը հանդիպել է իրանցի գործարարների հետ և քննարկել Հայաստանի հետ համագործակցության հեռանկարները:
«Հայտնի է, որ Հայաստանը հրաժարվել է թուրքական ապրանքների ներմուծումից, իսկ դա տարեկան շուրջ 200 մլն դոլարի շուկա էր: Շատերի կարծիքով՝ որոշ թուրքական ապրանքներ կարող են փոխարինվել իրանականով: Այդ տեսանկյունից Իրանը ակտիվացել է, տարբեր հանդիպումներ կազմակերպում, ցանկություն կա այդ ապրանքների մի մասը փոխարինել իրանականով»,- ասաց նա:
Դիտարկմանը, որ Իրանից ներկրվող ապրանքների մի մասն իրանական Ադրբեջանից է, փորձագետն ասաց. «Իրանական Ադրբեջանն ընդամենը Իրանում նահանգ է, և աշխարհում այդպիսի բան չկա, որ դու հրաժարվես որևէ երկրի որևէ կոնկրետ նահանգում արտադրված ապրանքներից: Բացի դրանից, իրանական Ադրբեջան չի նշանակում Ադրբեջան: Նրանք թե՛ մշակութային, թե՛ լեզվական առումով շատ տարբեր ժողովուրդներ են: Դա նույնն է, որ ասենք, Հայաստանը հրաժարվի Ռուսաստանի Թաթարստանի նահանգից ապրանքներ ներկրելուց, ինչ է թե՝ նրանք մուսուլման են: Եթե իրանական ապրանքները գալիս են Հայաստան, որևէ կապ չունի, թե դրանք որ նահանգում են արտադրվել: Դա Ադրբեջանի պետության հետ որևէ կապ չունի, գումարները գնում են Իրանի բյուջե»:
Հարցին, թե արդյոք հայ-իրանական հարաբերությունների խորացման առումով մեր իշխանությունների քայլերը բավարա՞ր են՝ հաշվի առնելով, որ այդ հարաբերություններում բեկում չի եղել, Արմեն Վարդանյանը համաձայնեց, որ բեկում չի եղել. «Միշտ քայլեր ձեռնարկվել են, որոնք դրական տեղաշարժ չեն գրանցել: Վերջին տարիներին մեր ապրանքաշրջանառության ծավալներն առանձնապես չեն էլ փոխվել: Հիմա կարծես այս իշխանությունը քայլեր ձեռնարկում է ապրանքաշրջանառության ծավալներն ավելացնելու ուղղությամբ: Համենայնդեպս, էկոնոմիկայի նախարարը վերջերս խոստացավ, որ մոտ ժամանակներս բացվելու է Մեղրիի ազատ տնտեսական գոտին: Վերջնական իրավիճակն ամփոփելու համար պետք է ունենալ թվային տվյալներ: Եթե իսկապես ապրանքաշրջանառության ծավալները մեծանան, կարելի կլինի խոսել բեկման մասին: Առայժմ դրանք միայն քայլեր են: Ես հույս ունեմ, որ առաջիկայում դրական տեղաշարժեր կարձանագրվեն այդ ուղղությամբ: Իշխանությունների խոստումներն ու քայլերը որոշակի լավատեսության հիմք են տալիս»:
