Հայաստանում ԱՄՆ դեսպան Լին Թրեյսին հանդիպել է ֆինանսների նախարար Ատոմ Ջանջուղազյանին, քննարկելով տնտեսական ռեֆորմների և կառուցվածքային փոփոխությունների հարցեր, կապված ներդրումային միջավայրի և տնտեսական հեռանկարների հետ: Հայաստանում հետպատերազմական շրջանում և առաջիկա մարտահրավերների համար հույժ կարևոր է ոչ միայն քաղաքական, և թող տարօրինակ չհնչի անգամ՝ ոչ այնքան քաղաքական, որքան ֆինանսական կայունությունը: Հայաստանի տնտեսությունը պատերազմից առաջ իսկ հայտնվել էր կորոնավիրուսով պայմանավորված տնտեսական բարդությունների առաջ:
Պատերազմը բազմապատկեց և ծանրացրեց դրանք: Ավելին, պատերազմը ոչ միայն ինքնին ծախս էր Հայաստանի ու Արցախի համար, այլ տնտեսական միլիարդավոր դոլարների կորուստ: Ընդ որում կորուստ ոչ միայն զուտ նյութական, այլ նաև գեներատիվ հզորությունների առումով: Այդ ամենը Հայաստանի համար առաջացրել են իսկապես ահռելի տնտեսական մարտահրավերներ, որոնք կարող են ռազմա-քաղաքական առումով անգամ ունենալ ավելի ծանր հետևանք, քան քաղաքական անկայունությունը: Սա գուցե որոշակիորեն պայմանական բնորոշում է, քանի որ անկայունությունը իհարկե իր բոլոր ձևերով է Հայաստանի համար անթույլատրելի, սակայն հարցը տվյալ պարագայում տնտեսական առերևույթ քիչ նշմարվող, բայց խորքային մեծ մարտահրավերների պատկերացումն է: Ահա այդ իմաստով, ԱՄՆ դեսպանի այցը ֆինանսների նախարարին թույլ է տալիս մտորել այն մասին, որ հայ-ամերիկյան հարաբերության օրակարգում կարող է հայտնվել Հայաստանի ֆինանսական կայունության ապահովման հարցը և Նահանգներն այդ իմաստով Հայաստանի համար կարող են լինել իսկապես արժեքավոր գործընկեր:
Մյուս կողմից, Հայաստանն իր հերթին այդ հարցում պետք է իրեն դիրքավորի հենց իբրև գործընկեր: Բանն այն է, որ Հայաստանը ցավագին ու ողբերգական պարտությունից հետո ունի քաղաքական ճկունության լուրջ խնդիր, սակայն, եթե այդ խնդիրը մինչ պատերազմն ու պարտությունը ռազմա-քաղաքական և տնտեսական դաշտում էր գրեթե հավասարապես, ապա այժմ այդ խնդրի լուծումը այլևս գերազանցապես տնտեսական դաշտում է:
