Իշխանական մի խումբ պատգամավորներ պատրաստվում են արգելել լրատվամիջոցներին անհայտ ծագումնաբանությամբ աղբյուրներին հղում կատարել։ ԱԺ «Իմ քայլը» խմբակցության պատգամավոր, ԶԼՄ-ի հետ կապված աղմուկ հանած նախագծի համահեղինակ Արթուր Հովհաննիսյանը նշում է՝ նման աղբյուրների հրապարակումները տարածում են իրական լրատվական գործունեություն իրականացնող ընկերությունները՝ փաստացի հղում տալով ու գովազդելով այդ աղբյուրներին, հանրության մոտ այդ աղբյուրները ասոցացվում ու լեգիտիմացվում են որպես իրական լրատվամիջոցներ և շատ դեպքերում ավելի հայտնի են դառնում, քան իրական լրատվամիջոցներն են, որոնք ունեն 30 հոգանոց աշխատակազմ ու ամբողջ օրը նյութ են գեներացնում, որ մատուցեն հանրությանը: «Մենք որևէ կերպ չենք արգելում լրագրողների տեղեկություն տարածելու իրավունքը: Մենք ասում ենք՝ սիրելի լրագրողներ, ինչպես նախկինում, երբ չկային տելեգրամյան ալիքներ, և դուք համացանցում ինչ-որ ինֆորմացիա էիք գտնում ու որպես լրագրող ստուգում էիք դրա իսկությունը ու հետո որոշում հրապարակել, հիմա էլ արեք նույն բանը՝ վերցրեք այդ տեղեկությունը և հրապարակեք ձեր կայքում, բայց որևէ կերպ մի՛ գովազդեք անանուն աղբյուրները, որոնք ազգային անվտանգության սպառնալիք կարող են դառնալ»,-նշում է նա։