Խորհրդարանի ընտրությանը մասնակցելու որոշման մասին Ռոբերտ Քոչարյանի հայտարարությունը փաստացի նշանակում է այսպես ասած՝ 17-ի ձևաչափի մարտավարության չեղարկում: Համենայնդեպս, մինչ այժմ այդ մարտավարությունը կարծես թե կառուցվում էր Նիկոլ Փաշինյանի մասնակցությամբ որևէ ընտրական պրոցեսի մերժման վրա: Բայց Ռոբերտ Քոչարյանը հայտարարում է, որ, եթե իշխանությանը հաջողվի արտահերթ ընտրություն նախաձեռնել առանց վարչապետի հրաժարականի, ապա ճիշտ չէ դրան չմասնակցելը: Երկրորդ նախագահը հայտարարել է նաև, որ մասնակցելու է իր թիմով և հաղթելու է: Ո՞րն է նախկին նախագահ Քոչարյանի թիմն ու ինչ կոնֆիգուրացիա ունի այն 17-ի ձևաչափում: Օրինակ՝ «Հայրենիք» կուսակցությունը, կամ ԲՀԿ-ն, կամ ՀՀԿ-ն, կամ թեկուզ ՀՅԴ-ն Ռոբերտ Քոչարյանի թի՞մ են, թե՞ ոչ: Թե՞ Քոչարյանի թիմ կա այդ բոլոր ուժերում էլ և արտահերթ ընտրության պարագայում այդ թիմը կհավաքվի, ինչը, մեծ հաշվով, կչեզոքացնի 17-ի ձևաչափերի այդ ուժերի ներուժը, ստիպելով նրանց խաղալ գերազանցապես Ռոբերտ Քոչարյանի տրամաբանության ու կանոնների շրջանակում: Թեմայի շուրջ «Առաջին լրատվական»-ը զրուցել է Հանուն Հանրապետության կուսակցության ղեկավար մարմնի անդամ Ռուբեն Մեհրաբյանի և Քաղաքացու Որոշում կուսակցության գործադիր մարմնի անդամ Հայկ Սահակյանի հետ: