Այսօր թվերով ունե՞նք պատկեր, թե պատերազմական իրադարձություններից հետո ինչպիսին է մեր տնտեսությունը՝ ինչպիսի հետևանքներ է թողել պատերազմը, թե՞ պատերազմի հետևանքները դեռ առջևում են․ «Առաջին լրատվական»-ի հարցին տնտեսագիտության դոկտոր, պրոֆեսոր Աշոտ Մարկոսյանը պատասխանեց․ «Մեր իրականության մեջ՝ հատկապես խոշոր տարերային աղետների, այդ թվում՝ պատերազմի ազդեցության գնահատման մեթոդաբանություն, ըստ էության, Հայաստանում չկա։ Բայց բոլորիս համար էլ հասկանալի է, որ պետք է իմանանք այդ գինը, որ ունեցանք տնտեսության վրա՝ հատկապես տնտեսության այն ոլորտների, որոնք ստեղծում են նյութական բարիքներ։
Եթե մենք փորձենք ինչ-որ չափով պատասխանել ձեր հարցին, ապա մենք ունենք անցած տարվա 11 ամիսների տվյալները։ Ճիշտ կլիներ, որ մենք գնահատական տայինք տարվա արդյունքներն ամփոփելուց հետո, սակայն, քանի որ այս պահի դրությամբ մենք ունենք Վիճակագրության պետական կոմիտեի հրատարակած 11 ամիսների տվյալները, որոշ ցուցանիշների մասով կարելի է բարձրաձայնել։ Հիմնական մակրոտնտեսական ցուցանիշներից ՏԱՑ-ը (տնտեսական ակտիվության ցուցանիշը) 7,2 տոկոսի չափով անկել է։ Ուշագրավ է նաև տնտեսության իրական հատվածի՝ արդյունաբերական արտադրանքի անկում 0,2 տոկոսի չափով, որն ամենաքիչն է եղել։ Հատկապես մեծ է եղել անկումը շինարարության մեջ, իսկ գյուղատնտեսության մեջ այն կազմել է ավելի քան 10 տոկոս։ Բնականաբար, որոշակի անկում ունենք նաև ինչպես առևտրի, այնպես էլ ծառայությունների ոլորտում։
Ընդհանուր առմամբ՝ ՀՆԱ-ի մեծությունը չափելու համար սրանք ամփոփ գնահատականներ չեն, որովհետև որոշակի տարբերություններ կան ՏԱՑ-ի և ՀՆԱ-ի միջև»։
Մանրամասները՝ տեսանյութում։
