«Վստահության աստիճանի կասկածներ ունեմ, որ Դավիթ Գալստյանին՝ նույն ինքը Պատրոն Դավոյին, ոչ մի մեղադրանք էլ չի առաջադրվել։ Նա իր համար ազատ շրջում է, ու ավելին՝ նրա ղեկավարած ընկերությունները բարեհաջող շարունակում են մասնակցել ՊՆ գնումներին»,- այս մասին «Առաջին լրատվական»-ի հետ զրույցում ասաց փաստաբան Ալեքսանդր Սիրունյանը։
Հիշեցնենք, որ հունվարի 18-ին Ազգային անվտանգության ծառայությունը լրատվամիջոցներից մեկին հայտնել էր, որ Դավիթ Տոնոյանի նախկին խորհրդական, զենքի առքուվաճառքով զբաղվող գործարար Դավիթ Գալստյանը որպես մեղադրյալ է ներգրավվել ԱԱԾ-ում քննվող քրեական գործերից մեկով։ Ըստ ԱԱԾ-ի՝ պաշտպանության նախարարության պաշտոնատար անձանց կողմից իրենց պաշտոնեական դիրքն օգտագործելով՝ մի շարք առևտրային ընկերությունների, այդ թվում՝ Դավիթ Գալստյանին պատկանող «Մոսսթոն էնջինիերինգ» ընկերության ծառայողների հետ նախնական համաձայնության գալով, ՀՀ պետական բյուջեից ապրանքներ ձեռք բերելու համար իրեն տրամադրված, իրենց վստահված առանձնապես խոշոր չափերով գումարներ հափշտակելու դեպքի առթիվ ՀՀ ԱԱԾ քննչական դեպարտամենտում հարուցված և քննվող քրեական գործով որոշում է կայացվել Դավիթ Գալստյանին որպես մեղադրյալ ներգրավելու մասին: ԱԱԾ-ի տրամադրած տեղեկատվության համաձայն՝ Գալստյանին մեղադրանք է առաջադրվել առանձնապես խոշոր չափերով յուրացման համար։ Գալստյանն անցնում է ԱԱԾ-ում քննվող չորս քրեական գործերով, որոնք վերաբերում են նրան պատկանող ընկերությունների կողմից մատակարարումներին: ԱԱԾ-ն ձեռք էր բերել առերևույթ փաստական տվյալներ ՀՀ պաշտպանության նախարարության և ՀՀ ԶՈՒ գլխավոր շտաբի համապատասխան պաշտոնատար անձանց կողմից պաշտոնեական լիազորությունները և դիրքը չարաշահելու, ծառայության նկատմամբ անփույթ վերաբերմունք դրսևորելու և յուրացման եղանակով առանձնապես խոշոր չափերով հափշտակություն կատարելու վերաբերյալ:
ԱԱԾ-ն, սակայն, առ այսօր չի տեղեկացրել, թե Գալստյանի նկատմամբ ինչ խափանման միջոց է ընտրվել, և որտեղ է գտնվում նա հիմա։
Փաստաբան Ալեքսանդր Սիրունյանի խոսքով՝ բոլորը գիտեն, որ երբ անձին մեղադրանք է առաջադրվում, ապա պետք է նաև ընտրվի խափանման միջոց: «Բայց այդ տեղեկատվությունից հետո քանի օր է՝ հետաքրքրվում ենք, թե ինչ խափանման միջոց է ընտրվել, ոչ մեկը ոչ մի բան չի ասում։ Իսկ հետո ես իմ տեղեկություններով, իմ աղբյուրներով պարզեցի, որ ոչ մի մեղադրանք էլ չկա։ Դավիթ Գալստյանը Հայաստանում է ու առաջվա պես շարունակում է զբաղվել ՊՆ գնումներով, գնում-գալիս է, գնումների հայտեր է ներկայացնում»,- ասաց Սիրունյանը։
Ավելին, մեր զրուցակցի խոսքով՝ ներկայումս Գալստյանը ՀՀ ՊՆ-ին ռուսական փամփուշտից էլ էժան գին է առաջարկում, ինչը շատ տարօրինակ է, քանի որ նույն Դավիթ Գալստյանը տարիներ շարունակ, այդ թվում՝ պատերազմի ժամանակ, ՊՆ-ի կարիքների համար փամփուշտը գնել է երկու անգամ թանկ, և միայն պատերազմից հետո, երբ Դավիթ Տոնոյանի ու Դավիթ Գալստյանի շուրջ աղմուկը բարձրացավ, փամփուշտի գինը կրկին երկու անգամ նվազել էր։
Թե ինչ ճանապարհով է Պատրոն Դավոյին հաջողվում ռուսական փամփուշտից էժան փամփուշտ գնել ու վաճառել ՀՀ ՊՆ-ին, և ինչ որակի են այդ փամփուշտները՝ թերևս պետք է պարզի հենց նույն ԱԱԾ-ն։
Մեզ չհաջողվեց ՀՀ ՊՆ-ից մեկնաբանություն ստանալ՝ արդյոք Դավիթ Գալստյանը շարունակո՞ւմ է մասնակցել գնումների գործընթացին, թե՞ ոչ։