Իհարկե, լավ է, որ իրանական կողմը պատրաստակամություն է հայտնում աջակցելու Հայաստան-Իրան տնտեսական ծրագրերի և նախագծերի իրականացմանը. այդ պրոցեսը միշտ էլ եղել է, մենք դրան ականատես ենք եղել: Այդ մասին «Առաջին լրատվական»-ի հետ զրույցում նշեց Թեհրանում լույս տեսնող «Արաքս» շաբաթաթերթի խմբագիր Մովսես Քեշիշյանը՝ անդրադառնալով նախօրեին Իրանում ՀՀ դեսպան Արտաշես Թումանյանի և Իրանի ԱԳՆ տնտեսական դիվանագիտության հարցերով նախարարի տեղակալ Սեյեդ Ռասուլ Մոհաջերի հանդիպմանը:
«Բայց չգիտես ինչու, այդ անիվը տեղից չի շարժվում, որ մենք նոր փոփոխություններ տեսնենք: Հուսանք, որ նոր հայտարարությունների հիման վրա նորություններ կտեսնենք: Թվում է, որ, համենայնդեպս, կամքը կա թե՛ Իրանի քաղաքական դեմքերի, թե՛ գործարար շրջանակների մոտ: Մանավանդ այնտեղ բոլորը տեսան, որ արցախյան երկրորդ պատերազմը ոչ միայն Հայաստանին, այլ նաև Իրանին մեծ վնասներ բերեց: Արդեն սկսել են աշխուժանալ և, ըստ այդմ, փորձում են և՛ տնտեսական, և՛ քաղաքական հարաբերություններով նոր մոտեցումներ ցուցաբերել և նոր ծրագրեր առաջ տանել»,- ասաց նա:
Քեշիշյանը նկատեց, որ արցախյան պատերազմից հետո ստեղծված իրավիճակը հայրենասեր իրանցիների, մտավորական խավի վրա մեծ ազդեցություն է թողել։ «Մտավորականությունը շատ է մտահոգություն հայտնում, որ այն, ինչ տեղի ունեցավ, Իրանի համար իսկապես վնասակար էր և պետք է միջոցներ ձեռնարկել այդ վնասները հնարավորինս նվազեցնելու ուղղությամբ, նոր ուղիներ բացելու Հայաստանի միջոցով Եվրասիա հասնելու, Հայաստանի հետ սահմանային հարաբերությունները ընդարձակելու համար: Երևի գիտեք, որ պատերազմի օրերին Իրանի հեղափոխության առաջնորդը հայտարարեց, որ միջազգային սահմանները որևէ փոփոխության ենթակա չեն, և մենք դա չենք ընդունում: Նույն ոգով Իրանի գրեթե բոլոր իշխանական խավերը այդ հարցով հայտարարություններ են անում: Հիմա պետք է սպասենք ու տեսնենք, թե գործնականում ինչ փոփոխություններ կլինեն հայ-իրանական հարաբերություններում»,-ընդգծեց Քեշիշյանը:
Նա տեսակետ հայտնեց, որ չի կարծում, թե այս հարցերը կապված են դեսպանի կամ այլ պաշտոնյաների հանդիպումներից. «Դրանք ուղղակիորեն կապված են քաղաքական կամքի, երկու երկրների ընդհանուր շահերով շարժվելու հիմքի հետ: Հուսանք, որ այդ փոփոխություններին ականատես կլինենք»:
Դիտարկմանը, որ տեսակետ կա, որ պատերազմից հետո Իրանը հասկացել է իր սխալը, որ իներտ կեցվածք է որդեգրել այդ ժամանակահատվածում, և արդյո՞ք հիմա Իրանը գիտակցում է իր սխալը, Մովսես Քեշիշյանն ասաց. «Ինձ թվում է, որ իրենք դա շատ լավ գիտակցում են: Ես փորձում եմ գնահատական տալ եղած սխալների ու թերությունների առումով: Իրենք փորձում են վերագնահատել, թե ինչ կորցրին: Հայաստանը կորցրել է տարածքներ և տարածաշրջանում որոշակի ճնշումների է ենթարկվել, բայց այն, ինչ գալիս է Իրանի գլխին այսօր ու գալու է վաղը, շատ ավելի վտանգավոր է: Իրենք դա շատ լավ զգում են և սկսել են, ըստ այդմ, փոփոխություններ մտցնել իրենց քաղաքականության և մոտեցումների մեջ: Թե որքանով հիմա ցցուն կլինեն այդ մոտեցումները Հայաստանի հետ հարաբերությունների մեջ, ինչպես իրենց ցույց կտան, պետք է սպասենք ու տեսնենք: Մենք էլ մեր հերթին պետք է աշխատանքներ տանենք: Իրանական կողմն այդ հարցում արդեն դժվարություններ չունի, որովհետև մինչև Հայաստանի սահման ճանապարհներ ունի»: