Իրանն ԱՄՆ-ի ընտրված նախագահ Ջո Բայդենից որևէ ուղերձ չի ստացել միջուկային գործարք վերադառնալու վերաբերյալ, Այդ մասին հայտնել է Իրանի կառավարության պաշտոնական ներկայացուցիչ Ալի Ռաբիին:
Նրա խոսքով՝ Թեհրանը կենտրոնացած է բոլոր մասնակից երկրների կողմից Գործողությունների համատեղ համապարփակ ծրագրի վերականգնման վրա և սպասում է, որ ԱՄՆ-ի նոր կառավարությունը նույնպես կկենտրոնանա Իրանի վստահության վերականգնման վրա՝ գործարքի բոլոր պարտավորությունների կատարման հաշվին: «Բայդենի թիմից ոչ մի ուղերձ մենք չենք ստացել: Սակայն քանի դեռ մենք չենք համոզվել, որ ԱՄՆ-ը, առանց որեւԷ պայմանի վերադառնալով իր պարտավորություններին, կգործի դրանց համապատասխան, բանակցություններն անիմաստ են»,- ճեպազրույցի ընթացքում ասել է Ռաբիին:
Ավելի վաղ իսրայելական ԶԼՄ-ները հաղորդել էին, որ ԱՄՆ-ի ընտրված նախագահ Ջո Բայդենի անունից պաշտոնական անձինք Թեհրանի հետ բանակցություններ են վարում Իրանի հետ միջուկային գործարքին Վաշինգտոնի վերադառնալու պայմանների շուրջ: 2015 թվականին «վեցյակը» (Մեծ Բրիտանիա, Գերմանիա, Չինաստան, Ռուսաստան, ԱՄՆ, Ֆրանսիա) և Իրանը հայտարարել են Գործողությունների համատեղ համապարփակ ծրագրի ձեռքբերման մասին: Համաձայնագիրը ենթադրում էր պատժամիջոցների վերացում՝ Իրանի միջուկային ծրագրի սահմանափակումների դիմաց: Գործարքը նախնական տեսքով նույնիսկ երեք տարվա կյանք չի ունեցել. 2018 թվականի մայիսին ԱՄՆ-ը հայտարարել է միակողմանի կարգով դրանից դուրս գալու և Թեհրանի նկատմամբ կոշտ սահմանափակումները վերականգնելու մասին: Իրանը 2019 թվականին հայտարարել է համաձայնագրի շրջանակներում իր պարտավորություններին փուլային կրճատման մասին՝ հրաժարվելով միջուկային հետազոտությունների սահմանափակումներից:
