Ինչպես տեղեկանում ենք գյուղատնտեսության նախարարության պաշտոնական կայքից, Հայաստանի ագրարային համալսարանում «Հայաստանում կենսաանվտանգության ազգային շրջանակի մշակում» ծրագրով անց է կացվել գիտաժողով, որը նվիրված էր գյուղատնտեսական կենսատեխնոլոգիաների և կենսաանվտանգության հիմնական սկզբունքներին:
Գիտաժողովին մասնակցում էին միջազգային փորձագետներ, խորհրդատուներ, ԳԱՀԿ և ԳԱՄԿ ներկայացուցիչներ, ֆերմերներ: Ելույթները ընդգրկում էին գյուղատնտեսական կենսատեխնոլոգիաների և կենսաանվտանգության կարողությունների հզորացման, կենսաանվտանգության կարգավորման ազգային և միջազգային մեխանիզմների, ռիսկերի վերլուծության և կենսաանվտանգության էկոլոգիական ասպեկտները: ՀՀ-ում այս խնդիրների լուծումն ու համակարգումն իրականացվում է FAO-ի, ՄԱԿ-ի Շրջակա միջավայրի (UNEP) և Ընդհանուր էկոլոգիական ֆոնդի (GEF) ծրագրերի օժանդակությամբ:
Ծրագրի ղեկավար Նևենա Ալեքսանդրովնան նշել է, որ մենք ապրում ենք փոփոխությունների աշխարհում՝ և’ կլիմայական, և’ քաղաքական, և’ տնտեսական առումով: Նրա խոսքով՝ աշխարհը նաև էներգիայի սպառման տեսանկյունից է փորձում փոփոխություններ արձանագրել՝ էներգիայի բնական աղբյուրներից անցում կատարելով վերականգնվող էներգիայի աղբյուրներին:
