«Միշտ ուզում էի այնպիսի «կնոպկա» լիներ, որ աղմուկը կլռեցներ: Եվ 9 տարի Սան Ֆրանցիսկոյում կոմունիկացիոն ընկերությունում աշխատելուց հետո, չորս տարի առաջ եկա Հայաստան, և երեք տարի առաջ ստեղծեցինք ընկերություն»,- «Առաջին լրատվական»-ի հետ զրույցում նշեց Krisp ընկերության հիմնադիր տնօրեն Դավիթ Բաղդասարյանը՝ խոսելով նոր ստարտափի սկզբնավորման և հաջողությունների մասին: Krisp-ն արդեն համագործակցում է աշխարհի խոշորագույն ընկերությունների հետ:
Օրերս հայտնի դարձավ, որ ընկերությունն արդեն գնահատվում է 120 միլիոն դոլար և ընկերության մի քանի բաժնետերեր արդեն միլիոնատեր են: «Արտերկրում բարձր աշխատավարձ ստանալով և շատ գումար ձեռք բերելով՝ հասկանում ես, որ դա քիչ է երջանիկ լինելու համար,- նշեց մեր զրուցակիցը,- մենք հասկացանք, որ Հայաստանում պետք է ապրենք, և դրա պատճառներից մեկն այն է, որ մեր երջանկության համար մեզ հարկավոր է շփվել հայերի հետ: Եվ պատճառներից մեկն էլ այն է, որ ուզում ես ազդեցություն թողնել քո երկրում, և այնպես գործել, որ որևէ բանով օգնես հայրենիքիդ»:
Դավիթ Բաղդասարյանի խոսքով՝ IT ոլորտը պետք է զարգացնել և մեծացնել այս ոլորտի դերը պետականաշինության մեջ: Նրա դիտարկմամբ՝ այսուհետ պատերազմներում կռվելու են ոչ թե բանակները, այլ ռոբոտները: «Կարելի է այնպիսի տեխնոլոգիաներ ստեղծել, որոնք կարող են եղանակ փոխել պատերազմում»,- նշեց Բաղդասարյանը՝ հավելելով, որ անհրաժեշտ է համարում առաջադեմ տեխնոլոգիական ոլորտի ակտիվացումը:
