Հայ ազգային կոնգրեսի երեկվա հանրահավաքի իր ելույթում ՀԱԿ առաջնորդ Լևոն Տեր-Պետրոսյանը դիմեց այն բոլոր ուժերին, որոնք խանգարում և քննադատում են երկխոսությունը, խորհուրդ տալով վերջիններիս չխանգարել, այլապես կենթարկվեն վերջնական մարգինալացման:
Քաղտեխնոլոգ Արմեն Բադալյանը «Առաջին լրատվականի» հետ զրույցում նշեց, որ քաղաքական գործընթացից դուրս մնացած երկու ոչ ազդեցիկ ուժերը` ՀՅԴ-ն և «Ժառանգությունը», բանակցային գործընթացների մեջ մտնելու համար քննադատում են միայն ՀԱԿ-ին. «Բայց չգիտես ինչու նույն կերպ չեն քննադատում բանակցություններին մասնակցող կոալիցիոն ուժերին: Նրանք անընդհատ նշում են, թե ՀԱԿ-ն իրավունք չունի հասարակության անունից խոսել, բայց ես չեմ լսել, որ նրանք ասեն, թե ԲՀԿ-ն էլ այդ իրավունքը չունի»:
Բադալյանի կարծիքով, եթե ՀՅԴ-ն կամ «Ժառանգությունը» իրոք ցանկանում են քննադատել երկխոսության գործընթացը, ապա պետք է հավասարապես քննադատեին նաև ՕԵԿ-ին, որը փաստացի որպես կուսակցություն գոյություն չունի. «Այսինքն՝ ստացվում է, որ վերոնշյալ կուսակցությունները նպատակադրված քննադատում են ՀԱԿ-ին, և սա պարզապես խանդի, նեղացածության տեսարան է, քանզի այդ կուսակցությունները չկարողանալով կայանալ՝ քննադատում են հաջողությունների հասած ՀԱԿ-ին»:
Քաղտեխնոլոգի կարծիքով, ՀԱԿ առաջնորդն իր ելույթում ճիշտ է նկատել, որ վերոնշյալ կուսակցությունները դուրս են մնացել բանակցային գործընթացից ոչ թե այն պատճառով, որ իշխանությունը գերադասել է ՀԱԿ-ի հետ բանակցել, այլ՝ որ այդ կուսակցությունները չեն կարողացել մի գաղափար, ծրագիր առաջ քաշել, որը հասարակության մեծ զանգվածների կհետաքրքրեր. «Նրանք պարզապես մրցակցությանը չեն դիմացել, իսկ քաղաքականության մեջ դիմանում են ուժեղները, նրանք թույլ գտնվեցին»:
