Ադրբեջանի նախագահ Իլհամ Ալիևը հայտարարեց, որ իրենց մոտ գտնվող գերիները ոչ թե ռազմագերիներ են, այլ ահաբեկիչներ, հանցագործներ, և գտնվում են բանտերում։ Արդյո՞ք սա նշանակում է, որ հայ գերիների վերադարձի գործընթացն առնվազն ձգձգվելու է․ «Առաջին լրատվական»-ի հարցին իրավապաշտպան Նինա Կարապետյանցը պատասխանեց․ «Ենթադրում եմ, որ ձգձգելու շանսերը կօգտագործեն, որովհետև իրենք էլ են շահագրգռված Հայաստանում տեսնել ավելի մեծ խառնաշփոթ, քան կա։ Նրանց ձեռնտու է այն իրավիճակը, որը տիրում է Հայաստանում, և գերիների հարցի չլուծումը այդ խառնաշփոթության կարևորագույն բլոկներից մեկն է։ Ես զարմացած չեմ՝ դա սպասելի էր, բայց ես զարմացած եմ, թե մեր իշխանություններն ինչպես են ջանասիրաբար բոլոր խաղաքարտերը կամովի հանձնել «Ռուսիո արքա» և «կիսաստված» պարոն Պուտինին։ Այն դեպքում, երբ իրենք հնարավորություն ունեին այս խնդրի լուծման համար ներգրավել միջազգային կառույցներին, այդ թվում՝ Մինսկի խմբի համանախագահ երկրներին։ Թե ինչքան իրենց պատեպատ տվեցին համանախագահ երկրները, այդ թվում՝ նախագահները, էլ անիմաստ է բացատրել։ Ամեն դեպքում պետք է փորձել շարունակել այս հարցի համար պայքարել, քանի որ մեր գերիների այնտեղ մնալը մեծ խնդիր է բոլորի համար»։
Իսկ փաստաբան Գևորգ Դավթյանն ասաց․ «Տեսեք՝ Ալիևի նման հայտարարությունները ոչ մի իրավական հիմք չունեն, դրանք զուտ քաղաքական հայտարարություններ են։ Դրանց նպատակն ավելի խուճապային տրամադրություններ ստեղծելն է Հայաստանում։ Այլ հարց է, թե մեր իշխանություններն ու մեր հասարակությունն ինչպես դա պետք է ընկալի։ Ես կարծում եմ, որ մենք այս առումով որևէ անհանգստության տեղիք չպետք է տանք, որովհետև դրանով մենք, այսպես ասած՝ ավելի շատ բենզին ենք լցնում կրակի վրա և նպաստում ենք, որպեսզի հարևան թշնամական երկրի նկրտումներն ավելի զարգանան, որոնք, ըստ էության, ուղղված են միայն Հայաստանի Հանրապետության թուլացմանը»։
Մանրամասները՝ տեսանյութում
