Հայաստանի և Արցախի արտգործնախարարությունները ստորագրել են համաձայնություն խորհրդակցությունների տարեկան ծրագրի մասին: Դա տեղի է ունեցել Հայաստանի արտգործնախարարի՝ Արցախ կատարած այցի շրջանակում, որը Արա Այվազյանի համար առաջինն էր Հայաստանի արտգործնախարարի պաշտոնում: Արցախում էլ նա հանդիպել է ԱՀ նոր նշանակված արտգործնախարար Դավիթ Բաբայանի հետ: Բաբայանը Արայիկ Հարությունյանի խորհրդականն էր, իսկ նախկին նախագահ Բակո Սահակյանի աշխատակազմում՝ խոսնակը: Վերջինս արտգործնախարարի պաշտոնում փոխարինեց Մասիս Մայիլյանին։
Արցախցի իրավապաշտպան, «Հելսինկյան 92» նախաձեռնության արցախյան կոմիտեի համակարգող Կարեն Օհանջանյանի կարծիքով՝ Արցախում ոչ կոմպետենտ կառավարում է ճգնաժամային իրավիճակում: «Եվ դա շարունակվում է հայ ազգի դավաճան, պետական հանցագործ Արայիկ Հարությունյանի գլխավորությամբ, ով իր անգրագիտությամբ և պետական մտածողության բացակայությամբ ոչնչացրեց Արցախի պետականությունը և Հայաստանի անպիտան վարչապետ Նիկոլ Փաշինյանի հետ միասին ոչնչացրեց հայկական երազանքը: Արցախում պետականություն գոյություն չունի. այն, ինչ ունենք այսօր, ավելի ճիշտ՝ այն, ինչ մնաց պատերազմից հետո, մեր սահմանադրական տարածքի միայն մեկ հինգերորդն է: Հետևաբար արժանապատվությունից զրկված այս անձի՝ Արցախի, այսպես կոչված, նախագահի ցանկացած որոշում ոչ այլ ինչ է, քան փորձ՝ ցույց տալու, որ նա կարծես գործունակ և օրինական է: Ինչ վերաբերում է Մասիս Մայիլյանի հրաժարականին, դա երկար սպասված որոշում է, և ես կարծում եմ, որ դա մեր ժողովրդի համար ամենապահանջված որոշումներից է»,- «Առաջին լրատվական»-ի հետ զրույցում ասաց նա։
Մեր զրուցակցի խոսքով՝ Մասիս Մայիլյանը հավասարապես պատասխանատու է Արցախի կործանման համար. «Նա իրեն ցույց տվեց որպես անտաղանդ դիվանագետ և ավելին՝ վախկոտ և անպետք մարդ: Այս «մոխրագույն մկնիկը», Արայիկ Հարությունյանի հետ միասին, մեղավոր է նաև Արցախում իրավիճակն ապակայունացնելու, Ստեփանակերտի ավտոկայանում գաղտնի բողոքներ կազմակերպելու ընդդեմ Բակո Սահակյանի և ականավոր զինվորական ղեկավարների, ինչը դարձավ մեր քաջարի բանակի կործանման նախերգանքը: Փորձառու դիվանագետ Դավիթ Բաբայանի թեկնածությունը սպասելի էր: Ես հարգում եմ Դավիթին՝ որպես խելացի և պարկեշտ անձնավորության: Բայց ներկայիս պայմաններում ես չեմ հավատում, որ նա ի վիճակի է փոխելու մեր պետության մնացորդների դիվանագիտական բաղադրիչը… Այսպես թե այնպես, Դավիթ Բաբայանին հաջողություն եմ մաղթում հենց այս առանցքային պաշտոնում»։
Ինչ վերաբերում է ստորագրված համաձայնությանը, ապա Կարեն Օհանջանյանի դիտարկմամբ՝ դա պարզապես ինչ-որ գործունեության իմիտացիա է. «Չկա հայկական դիվանագիտություն, առավել ևս՝ արցախյան դիվանագիտություն: Այս ամենը ոչ պակաս ընդունելի կլիներ, եթե պետական հանցագործ և ազգի դավաճան Նիկոլ Փաշինյանը հրաժարական տար ու հույսի լույս առաջացներ հայերի մեջ: Բայց եթե այս ոճրագործը, որը ոչնչացրեց մեր բոլոր նվաճումները և պատասխանատու է ազգի ավելի քան 6 հազար փառահեղ հերոսների մահվան համար, մնա իր պաշտոնում, Ռուսաստանի և Ադրբեջանի կողմից Արցախի և Հայաստանի մի մասի բռնազավթման լույսի ներքո Հայաստանի և Արցախի կառավարության միջև որևէ պայմանավորվածություն ավելի շատ կեղծիք է թվում: Եվ հենց այս համատեքստում պետք է դիտարկել դիվանագիտական ներկայացուցչությունների միջև կնքված համաձայնագրերը»։
