Միկրոէլեկտրոնիկայի հայաստանյան ամենամյա միջազգային վեցերորդ օլիմպիադան տեղի կունենա սեպտեմբեր-հոկտեմբեր ամիսներին, որին կարող են մասնակցել մինչև 30 տարեկան ուսանողներ և ճարտարագետներ Հայաստանից ու արտերկրից: Օլիմպիադայի գլխավոր կազմակերպիչը «Սինոփսիս Արմենիա» կազմակերպությունն է:
Այս տարի օլիմպիադային մասնակցելու ցանկություն են հայտնել երիտասարդներ Բուլղարիայից, Գերմանիայից, Հորդանանից, Ռուսաստանից, Սաուդյան Արաբիայից, Սերբիայից, Արաբական Միացյալ Էմիրություններից, Ուկրաինայից և ԱՄՆ-ից:
Օլիմպիադան անցկացվելու է 2 փուլով: Առաջին փուլը տեղի կունենա մասնակից բոլոր երկրներում` ստուգարքի ձևով, իսկ վերջնական փուլը, որտեղ կմրցեն բոլոր երկրների լավագույն մասնակիցները` 2011 թ. հոկտեմբերի 11-ին կանցկացվի Հայաստանում, «Սինոփսիս Արմենիայի» Ուսումնական դեպարտամենտում:
Առաջին, երկրորդ և երրորդ տեղերից բացի, մրցանակներ կլինեն նաև հետևյալ անվանակարգերում` Լավագույն ճարտարագիտական լուծում, Ամենաստեղծագործական լուծում, Ամենայուրօրինակ լուծում, Լավագույն աղջիկ մասնակից, Ամենաերիտասարդ մասնակից և Լավագույն արդյունք յուրաքանչյուր երկրից:
Օլիմպիադայի նպատակն է Հայաստանում և մասնակից երկրներում խթանել միկրոէլեկտրոնիկայի զարգացումը, հայտնաբերել և խրախուսել երիտասարդ, տաղանդավոր կադրերի, մեծացնել միկրոէլեկտրոնիկայի նկատմամբ հետաքրքրությունը երիտասարդ մասնագետների շրջանում, պարզել մասնակից երկրների երիտասարդ մասնագետների շրջանում միկրոէլեկտրոնիկայի բնագավառում գիտելիքների մակարդակը և անհրաժեշտ ճշգրտումներ կատարել կրթական ծրագրերում, ինչպես նաև նպաստել միկրոէլեկտրոնիկայի ոլորտի երիտասարդ մասնագետների համայնքի ձևավորմանը:
