ԱՄՆ նախագահի վարչակազմը պատրաստվում է ծայրահեղականությանը հակազդելու նոր պետական ռազմավարություն ներկայացնել: Այս դեպքում խոսքը գնալու է ոչ միայն իսլամական ծայրահեղականության մասին, այլև՝ ծայրահեղական բոլոր դրսևորումների: Այս մասին հաղորդում է Associated Press գործակալությունը, որին հասանելի է դարձել նորացված ազգային ծրագիրը:
Չնայած այն փաստին, որ «Ալ-Քաիդան» և այլ իսլամիստական կազմակերպություններ շարունակում են մեծ վտանգ ներկայացնել ԱՄՆ ազգային անվտանգության համար՝ նոր ռազմավարությամբ դիտարկվելու են բոլոր տեսակի ծայրահեղական դրսևորումները: 8 էջանոց փաստաթղթի հիմնական թեման ներքին ահաբեկչության խոչընդոտումն է. «Միացյալ նահանգների կառավարությունը պետք է աշխատի հաղթահարել ծայրահեղականության կոշտ դրսևորումները և ամեն ինչ անի, որպեսզի ստեղծվող խմբերն ու գաղափարախոսությունները չկարողանան աջակցություն գտնել մեր երկրում»,- ասված է փաստաթղթում:
