Թուրքական Zaman թերթի փոխանցմամբ՝ Եվրոպայում ամենաքիչ երիտասարդներ բնակվում են Գերմանիայում, իսկ ամենաշատը՝ Թուրքիայում։ Այս մասին հայտարարել է Գերմանիայի Դաշնային վիճակագրական վարչությունը։
Վերջինիս այսօր հրապարակած զեկույցի համաձայն՝ Գերմանիայում բնակվող 81 միլիոն մարդուց միայն 16.5 տոկոսի տարիքն է կազմում 18-ից ցածր։ Մինչդեռ 72 միլիոն բնակչություն ունեցող Թուրքիայում այդ ցուցանիշը կազմում է 31.2 տոկոս։
Ֆրանսիայում երիտասարդների մասնաբաժինը կազմում է 22 տոկոս, իսկ Մեծ Բրիտանիայում, Հոլանդիայում և Սկանդինավյան երկրներում՝ 20 տոկոս։
Հիշեցնենք, որ Եվրոպայի բնակչությունը ծերանում է, ուստի նաև աճում է աշխատուժի՝ ներգաղթյալների պահանջը։ Եվրահանձնաժողովի հաշվարկներով՝ առանց նրանց հոսքի՝ միայն ԵՄ-ում աշխատանքային ռեսուրսները հետագա 50 տարում կկրճատվեն մոտ 100 միլիոնով, անգամ եթե բնակչությունն ընդհանուր առմամբ շարունակի աճել։
Եվրոպական ժողովուրդների թվաքանակը չի աճում, բնակչությունը ծերանում է, իսկ թուրքերն ունեն և կպահպանեն բարձր աճ, բարձր է ծնելիությունը։ Ներկայումս Եվրոպային մտահոգում է, թե ԵՄ-ին Թուրքիայի անդամակցության պարագայում ինչպիսի՞ն կլինի իր վիճակը 50-100 տարի անց. արդյոք այն չի՞ ողողվի թուրքերով, քանի որ Թուրքիայի բնակչությունը ծերացած չէ, մահացությունն էլ գնալով նվազում է։
