«Հադրութի սահմանային սադրանքը ադրբեջանական զինված ուժերի կողմից առաջին հերթին փորձ էր ավարատին հասցնել Հադրութի շրջանն ամբողջությամբ սեփական գերակայության տակ վերցնելու, քանի որ երկու-երեք գյուղ մնացել էր: Դա հակասում էր նոյեմբերի 9-ին ստորագրված փաստաթղթին: Հայկական կողմը նոյեմբերի 9-ից հետո կարծես թե առաջին անգամ դիմադրություն ցուց տվեց՝ հենվելով այս փաստաթղթի վրա, և ռուսական կողմի օժանդակությամբ հնարավոր եղավ այդ հատվածները թողնել հայկական կողմի ենթակայության տակ»,- «Առաջին լրատվական»-ի հետ զրույցում այս մասին ասաց քաղաքագետ Ռոբերտ Ղևոնդյանը: Նրա կարծիքով՝ այս սադրանքը պլանավորված էր և պատահական չէ, որ այն տեղի ունեցավ Մինսկի խմբի համանախագահների՝ Բաքու կատարած այցի օրը: «Ադրբեջանը փորձեց ցույց տալ, որ ուժի դիրքերից խոսելը մնում է օրակարգում»,- նշեց քաղաքագետը:
Պատմաբան Զոհրաբ Գևորգյանը նկատեց, որ հաճախ դիվանագիտական ռեսուրսները մսխվում են, քանի որ չեն կարողանում նրբանկատություն ունենալ և կարդալ դիվանագիտական ուղերձները: «Մասնագիտական լեզուն հասկացող և դրան ընթացք տվող բավարար ռեսուրս չունենք»,- նշեց պատմաբանը:
Անդրադառնալով դիտարկմանը, որ Ադրբեջանը հատուկ էր ընտրել սահմանի այդ հատվածը, քանի որ այնտեղ խաղաղապահներ չեն եղել, իսկ այժմ արդեն տեղակայված են, վերլուծաբան Հայկ Խալաթյանը նշեց. «Այո: Եվ այօր Ադրբեջանի խորհրդարանի խոսնակը մեղադրեց ՌԴ-ին՝ ասելով, որ այդտեղ ռուս խաղաղապահներ չպետք է տեղակայված լինեին»:
Վերլուծաբանի խոսքով՝ Ադրբեջանը նաև ընդդեմ Ռուսաստանի է մեսիջներ հղում: «ՌԴ-ին պետք է. որ այնտեղ մնա հայկական բնակչությունը, իսկ Ադրբեջանն ամեն ինչ անելու է, որ հայ բնակչությունն իրեն ապահով չզգա, և անընդհատ սադրանքներ ու պրովոկացիաներ է անելու»,- նշեց Հայկ Խալաթյանը: Նա նաև հավելեց, որ Ռուսաստանը հասկացնում է, որ այս տարածաշրջանում գլխավոր խաղացողն ինքն է և առանց իրեն ոչ մի հարց չի լուծվելու:
Ռոբերտ Ղևոնդյանն ընդգծեց, որ պետք է ճշգրտել, թե որն է ՀՀ շահը և որն է Արցախի շահը. «Դրանք կարծես թե սկսում են տարբաժանվել, և Արցախի իշխանությունները գերադասում են Արցախի ռուսականացաման սցենարը»:
Մանրամասն՝ տեսանյութում:
