Եվրամիությունն անօրինական է համարում ԱՄՆ-ի արտաերկրային պատժամիջոցները «Հյուսիսային հոսք – 2»-ի դեմ և քաղաքական տեսակետով այլ կերպ է գնահատում նախագծի իրականացումը, քան Վաշինգտոնը: Այդ մասին հայտարարել է Գերմանիայի արտգործնախարարության ղեկավար Հայկո Մաասը դեկտեմբերի 4-ին Der Spiegel հանդեսում հրապարակված հարցազրույցում հաղորդել է ՏԱՍՍ-ը։
«Մենք պատրանքներ չունենք այս հարցի վերաբերյալ: Հանրապետականների և դեմոկրատների միջև այստեղ հազիվ թե կարծիքների տարբերություն լինի»,- ասել է նա: «Բայց (ԱՄՆ-ի նոր վարչակազմի) նոր տոնը և քննարկումներ վարելու այլ ձևը կնպաստեն, որ մեզ հաջողվի առաջընթացի հասնել այս հարցի շուրջ»,- կարծում է Մաասը: «Մենք՝ եվրոպացիներս, կարծում ենք, որ արտաերկրային պատժամիջոցներն անօրինական են: Այստեղ ոչինչ չի փոխվի»,- ընդգծել է նախարարը: Գերմանիայի ԱԳՆ-ի ղեկավարը նշել է, որ «զուտ տնտեսական տեսակետից ԱՄՆ-ը շահագրգռված է սեփական հեղուկացված գազի վաճառքի հարցում»:
«Ես խնդիր չեմ տեսնում Գերմանիայում ենթակառուցվածքի բարելավման գործում (հեղուկացված բնական գազի ընդունման համար): Քաղաքական տեսակետից մենք իրադրությունն այլ կերպ ենք գնահատում, քան ԱՄՆ-ը. մենք կախվածության մեջ չենք ընկնում ումից որ լինի՝ կառուցելով «Հյուսիսային հոսք – 2»-ը,- նշել է Մաասը: 2021 ֆինանսական տարվա (սկսվել է հոկտեմբերի 1-ին) համար երկրի ռազմական բյուջեի՝ ԱՄՆ-ի Կոնգրեսի երկու պալատների կողմից համաձայնեցված նախագծը ներառում է պատժամիջոցների ընդլայնում «Հյուսիսային հոսք – 2» և «Թուրքական հոսք» գազատարների նկատմամբ: Ամռանը նախ դեմոկրատների կողմից վերահսկվող Ներկայացուցիչների պալատը, իսկ այնուհետև Սենատը, որտեղ մեծամասնությունը հանրապետականներն են, հավանություն են տվել 2021 ֆինանսական տարվա ռազմական բյուջեի նախագծի՝ իրենց տարբերակներին: Դրանից հետո երկու պալատների ներկայացուցիչներից կազմվել է հանձնախումբ այդ երկու փաստաթղթերի մանրամասների համաձայնեցման համար: Այժմ կոնգրեսականները և սենատորները կրկին պետք է քվեարկեն համաձայնեցված փաստաթղթի համար: Բյուջեի վերջնական նախագիծը կուղարկվի պետության ղեկավարին՝ ստորագրման համար:
