Ուկրաինայի արտաքին գործերի նախարար Դմիտրիյ Կուլեբան հայտնել է, որ Ղրիմի պլատֆորմի ստեղծման հարցում Թուրքիան Ուկրաինայի համար լավ գործընկեր կլինի: Այս մասին հաղորդում է «Անադոլու աժանսը» լրատվական կայքը:
Կուբելան կայքի թղթակցի հետ զրույցում նշել է, որ Ուկրաինան, Ղրիմի պլատֆորմը ստեղծելով, ցանկանում է ուղղել պատմական սխալը: «Կա միայն մեկ լուծում. Ռուսաստանը պետք է դուրս գա Ուկրաինայի օկուպացրած տարածքներից, և Ուկրաինան պետք է վերականգնի տարածքային ամբողջականությունը և այդ տարածքներում իր գերիշխանությունը»,- նշել է նա: Կուբելան հայտարարել է նաև, որ Ուկրաինան ամեն օր ռազմավարական տեսանկյունից ավելի է մոտենում Ղրիմի և Դոնբասի հարցի լուծմանը:
Կուբելան իր խոսքում Թուրքիային շնորհակալական խոսքեր է ուղղել տևական աջակցության համար՝ նշելով, որ Թուրքիայի նախագահ Ռեջեփ Թայիփ Էրդողանը և Ուկրաինայի նախագահ Վլադիմիր Զելենսկին մեծ ջանքեր են գործադրում տարբեր խնդիրների լուծման համար: Նախարարը հատկապես առանձնացրել է Ղրիմի թաթարների հարցը:
Ուկրաինայի իշխանությունն աջակցում է Ղրիմի միջազգային պլատֆորմի ստեղծմանը, ուր և ցանկանում է տեղափոխել Ղրիմի հարցի քննարկումը։ 2020 թվականի հոկտեմբերի 16-ին պաշտոնական այցով Թուրքիա ժամանած Ուկրաինայի նախագահ Վլադիմիր Զելենսկին Թուրքիայի նախագահ Էրդողանի հետ հանդիպումից հետո հայտարարել է, որ Թուրքիան պատրաստ է աջակցել Ղրիմի միջազգային պլատֆորմին, քանի որ Սև ծովի հյուսիսային ավազանի անվտանգության շուրջ Թուրքիան և Ուկրաինան համակարծիք են։
