ԲՀԿ-ն կարծես թե բավական լուրջ է ձեռնմուխ եղել Պուտինին Հայաստան բերելու գործին, ինչի համար որպես առիթ է փորձում օգտագործել Ծաղկաձորում օգոստոսի 20-ին կայանալիք երիտասարդական հավաքը:
Այդ հավաքի կազմակերպիչները ԲՀԿ անդամ երիտասարդներ են, ու թերևս դժվար չէ ենթադրել, որ հավաքն էլ իրականացվելու է Գագիկ Ծառուկյանի հովանավորությամբ: Այստեղ, նշմարվու է գործընթացի երկու շերտ:
Նախ, առաջինն այն է, որ ԲՀԿ-ն փաստացի փորձում է իր «բազեն» ունենալ, սակայն ավելի ընդգրկուն՝ ԱՊՀ մասշտաբով, ու թեև ժամանակային առումով ԲՀԿ «բազեն» ավելի կարճ է տևում և սեզոնային պարբերականություն չունի, այդուհանդերձ քաղաքական մասշտաբով կարծես թե փորձ է արվում դրանից ավելի լուրջ էֆֆեկտ ստանալ: Այդ փորձի մեջ է թերևս տեղավորվում այն, որ ԲՀԿ անդամ Անի Ալավերդյանը Ռուսաստանի իշխանության այսպես ասած «բազեականների»՝ Սելիգերում պարբերաբար հավաքվող երիտասարդների հավաքի ժամանակ անմիջական հրավեր հղեց Սելիգերում հյուրընկալված Վլադիմիր Պուտինին: Այդպիսով, Բարգավաճ Հայաստանը փաստորեն թե՛ փորձում է գերազանցել Հանրապետականի «Բազե»-ին, թե՛ փորձում է նաև գերազանցել հենց Հանրապետականին, որի նախագահն ու վարչապետը երեք տարի է, ինչ չեն կարողանում Պուտինին որևէ կերպ բերել Հայաստան, և եթե ԲՀԿ երիտասարդներին հաջողվի դա անել, ապա այդ փաստը կարող է ոչ միայն լուրջ հարված լինել ՀՀԿ երիտասարդներին, այլ նաև ՀՀԿ ղեկավարությանը:
Մյուս կողմից՝ իսկ եթե Պուտինը չգա, արդյոք դա էլ իր հերթին հարված կլինի՞ ԲՀԿ-ին: Ինչ-որ չափով՝ այո, որպես չստացված հնարք: Բայց Բարգավաճ Հայաստանն ինչ-որ տեղ ապահովագրել է իրեն այդ հնարքի բացասական էֆեկտից՝ անմիջականորեն, կուսակցական ղեկավարության քաղաքական մակարդակով չմիջամտելով գործընթացին և այն դնելով զուտ երիտասարդական հիմքի վրա:
Ըստ երևույթին դա պայմանավորված է ոչ միայն անհաջողության դեպքում հարվածից խուսափելու, այլ երևի թե առանձնապես հաջողության ակնկալիքներ չունենալու հանգամանքով: Հարցն այստեղ այն է, որ ԲՀԿ-ական աղջնակը Պուտինին Հայաստան էր հրավիրում Հայաստանի երիտասարդության անունից:
Իսկ ո՞վ է հարցում արել Հայաստանի երիտասարդության շրջանում և պարզել՝ ուզո՞ւմ է երիտասարդությունը Պուտինին տեսնել Հայաստանում, թե՞ ոչ: Իսկ գուցե հարցումը պարզի, որ երիտասարդությունը չի ուզում Պուտինին տեսնել, կամ երիտասարդության համար միևնույն է՝ կգա, թե չի գա Պուտինը Հայաստան:
Այնպես որ, թերևս պետք է այս կամ այն հրավերը ուղղելիս հանդես գալ հրավիրող կողմի կոնկրետ մատնանշումով և ԲՀԿ երիտասարդությանը չնույնացնել Հայաստանի երիտասարդության հետ:
ԲՀԿ-ում Հայաստանի երիտասարդության մի փոքր մասն է միայն, իսկ Հայաստանւի երիտասարդության մեծ մասը շատ ավելի կարևոր և լուծման տեսանկյունից հրատապություն պահանջող բարդ խնդիրներ ու հոգսեր ունի, քան Պուտինին Հայաստան հրավիրելը: