«Քաոս, անկառավարելի վիճակ, ջարդված պետություն. երկրում հետպատերազմական ճգնաժամ է: Այս մասին «Առաջին լրատվական»-ի հետ զրույցում ասաց սոցիոլոգ Արտակ Սաղաթելյանը՝ հավելելով, որ պետք է կենտրոնանալ այսօրվա և վաղվա անելիքների վրա:
«Մեր ջանքերը պետք է ուղղել ելքերի վրա, ընդամենը հինգ տարի ժամանակ ունենք, և այդ ընթացքում շատ անելիքներ ունենք»,- ասաց սոցիոլոգը: Նրա խոսքով՝ սթրեսից դուրս գալու համար առաջին հերթին անվտանգության խնդիրը պետք է լուծել. «Պետք է հստակ տեսնենք, որ բանակը վերակազմավորվում է և հզորանում է: Պետք է գործողություններ տեսնենք, որոնք կփաստեն դրական դինամիկայի մասին, և այդ դեպքում հոգեբանական սթրեսից հնարավոր կլինի հեշտ դուրս: Կարևոր է շուտ այս ամենից հնարավորինս շուտ դուրս գալ»: Արտակ Սաղաթելյանի դիտարկմամբ՝ պետությունը կորցնելու վտանգի առաջ ենք, առկա է նաև պատասխանատվության ճգնաժամ:
«Զուգահեռներ անցկացնելով 100 տարի առաջ տեղի ունեցած իրադարձությունների հետ՝ պատմաբան Զոհրաբ Գևորգյանն ընդգծեց, որ անկումային փուլից հնարավոր է դուրս գալ միայն սովորելով: «Այսինքն՝ զուգահեռներ տանելը պատահական չէ, կան նմանություններ և տարբերություններ, և կա մեծ խաբկանք, թե պատմությունը կրկնվում է, բայց պատմությունը միայն մակերեսով է կրկնվում, իսկ բովանդակությամբ բազմաթիվ գործոններ կան, որ այն ժամանակ գոյություն ունեին, այժմ գոյություն չունեն, հիմա այլ հանգամանքներ և տեխնոլոգիաներ կան: Մենք հաճախ ապրում ենք ինքնախաբեության աշխարհում և փորձում ենք իրականությունը կոծկել, տեսնել լղոզված, որ այդ իրականությունը մեզ հոգեբանական դիզկոմֆորտի մեջ չդնի: Այս առումով եթե խոսում ենք կառավարման ճգնաժամի մասին, հարց է առաջանում, իսկ ե՞րբ կառավարման ճգնաժամի մեջ չենք եղել… Ես պարտություն կհամարեի, եթե այս անկումային փուլից սովորելով դուրս չգայինք»:
Պատմաբանի դիտարկմամբ՝ անհրաժեշտ է հասանելի նպատակներ դնել, արագ հասնել դրանց իրականացմանը և փորձել հնարավորինս արդյունավետ դուրս գալ այս իրավիճակից:
Մանրամասն՝ տեսանյութում: