Սթենֆորդի համալսարանի հրատարակչությունը հրատարակել է ամերիկացի պատմաբան Ջանեթ Քլեյնի «Կայսրության սահմանները – Քրդական զինված միավորումները Օսմանյան ցեղային տարածքներում» (The Margins of Empire. Kurdish Militias in the Ottoman Tribal Zone) խորագրով գիրքը։
288-էջանոց այդ գիքը նվիրված է 20-րդ դարասկզբին թուրքերի և քրդերի փոխհարաբերություններին: Գրքում անդրադարձ է կատարվում նաև հայ բնակչության դեմ քրդերին օգտագործելու Օսմանյան կայսրության քաղաքականությանը.
«20-րդ դարասկզբին Օսմանյան կայսրությունն իր արևելյան շրջաններում բազմաթիվ սպառնալիքներ էր բացահայտել: Հեռավոր քուրդ բնակչության նկատմամբ վերահսկողություն սահմանելու համար Օսմանյան իշխանությունները նրան վերածեցին ցեղային զինված միավորումների և հանձնարարեցին վերահսկել այն, ինչ համարում էին հայկական սպառնալիք։ Սակայն վերջիվերջո հայ հեղափոխականները չճնշվեցին»:
Հիշեցնենք, որ նախորդ տարվա դեկտեմբերին Դիարբեքիրի Առևտրի ու արդյունաբերության պալատի նախագահ Գալիփ Էնսարիօղլուն, հանդես գալով Ստամբուլում կազմակերպված «Քրդական սեմինարում», անդրադարձ էր կատարել Առաջին համաշխարհային պատերազմի ժամանակ Օսմանյան կայսրությունում իրականացված գազանություններին.
«Ընդհանուրի մեջ մենք էլ «մի քիչ» մեղքի մեր բաժինն ունենք: Մենք՝ քրդերս, իթթիհատականների ազգային պետության ստեղծման ժամանակ գլուխներս կորցրինք և հայերի ու ոչ մուսուլմանների հանդեպ իրականացված բռնությունների ժամանակ ոչ միայն դիտորդի դերում չմնացինք, այլև գործիք դարձանք իթթիհաթականների ձեռքում: Այն ժամանակ այս հողերում բնակվողների 25 տոկոսը ոչ մուսուլմաններ էին: Հայերը մեր ձեռքով մորթվեցին»: