Ռուսաստանի գիտությունների ակադեմիայի Համաշխարհային տնտեսության և արտաքին հարաբերությունների ինստիտուտի առաջատար մասնագետ Ալեքսանդր Կռիլովն «Առաջին լրատվականի» հետ զրույցում կարծիք հայտնեց, որ դժվար է որևէ կերպ մեկնաբանել ՌԴ նախագահ Դ.Մեդվեդևի՝ ԼՂ հարցի կարգավորման վերաբերյալ Հայաստանի և Ադրբեջանի նախագահներին հղած ուղերձը, քանզի դրա բովանդակությունը բացահայտված չէ:
Կռիլովը նաև նկատեց, որ ինքը կասկածում է, որ Ադրբեջանը դրական պատասխան է տվել այդ ուղերձին, քանզի Ադրբեջանի արտգործնախարարը վերջերս բավականին խիստ քննադատել է ռուսական քաղաքականությունը և միջնորդությունը՝ ԼՂ հարցի հետ կապված:
Ալեքսանդր Կռիլովի խոսքերով, ուղերձ հղելով՝ Ռուսաստանը ցուցադրում է իր դերն ու ակտիվությունը որպես միջնորդ. «Նա կարող է իր այդ դերը շարունակել նաև հետագայում, սակայն կարևորը ոչ թե միջնորդի ակտիվ դերակատարությունն է, այլ կողմերի դիրքորոշումները, և քանի դեռ դրանք չեն փոխվել, ոչ մի միջնորդ չի կարող ստիպել Հայաստանին և Ադրբեջանին ընդունել այս կամ այն որոշումը: Այսինքն, քիչ հավանական է, որ առաջիկայում էլ իրավիճակը կփոխվի»:
Փորձագետի գնահատմամբ՝ ԼՂ հարցի կարգավորման գործընթացում խաղաղ համաձայնության հասնելու համար անհրաժեշտ է, որպեսզի կողմերն ունենան ընդհանուր մոտեցումներ: Կռիլովը նաև խոսեց այն մասին, որ վերջին օրերին քննարկվում է Թուրքիայում գտնվող՝ Հայաստանի պատմական տարածքների հարցը. «Այս մասին վերջերս նաև Սերժ Սարգսյանը խոսեց, և դա ևս դրամատիզմ է հաղորդում իրավիճակին ու ցույց տալիս, որ Հայաստանը չի մոռանում, որ իր պատմական հողերն այժմ գտնվում են Թուրքիայի տարածքում, և այս իրավիճակում ավելորդ է խոսել այն մասին, թե Հայաստանն ինչ-որ տարածքներ կզիջի Ադրբեջանին: Մենք ունենք մի իրավիճակ, կողմերի այնպիսի դիրքորոշումներ, որ ո՛չ Մեդվեդևը, ո՛չ Բարաք Օբաման, ո՛չ էլ Աստված չեն կարող փոփոխել այդ դիրքորոշումները»:
